ZALEN January 7, 2025 : Mahnia ke a kal thei lo, wheelchair hmang, Mumbai atanga lo kal Prakash Nadar chuan nimina Synod Hospital, Durtlang a thisen a pek hnuah vawiin khan People with Disabilities (PwD) Commissioner Vanlaldiki Sailo hnenah Civil Hospital Blood Bank panna turah ramp a awm loh avangin complaint a thehlut.

Prakash Nadar hian PwD Commissioner hnenah complaint a theh luh chhan hi Civil Hospital Blood Bank-in rualbanlote tana kalna tur ramp a neih loh vanga a ni a, Blood Bank panna atana ramp siamna tur hian sum pek vek an ni a ti a, hetianga State Blood Bank lian bera ramp a awm lo hi hrethiam lovin Central Ministries lamah pawh hmalak zel a tum tih a sawi.

Vawiin khan Prakash Nadar hian Civil Hospital Blood Bank kawtah ramp awm loh avanga lungawilohna lantirin Mizoram atang pawhin mi engemaw zatin an tawiawm a, hemi hnu hian PwD Commissioner hnenah hian lungawilohna thu hi a han thleng a ni.

Thisen vawi 126 pe ta Prakash Nadar hian India ram state tinah thisen pek kim tumin hma a la a, tun thleng hian State 25 leh UT 5-ah thisen a pe tawh. Aizawl-ah hian Civil Hospital Blood bank-ah thisen pek a tum a, mahse, rualbanlo te kalna tur ramp a awm loh avangin Synod Hospital-ah hian a pe ta zawk a ni.