Aizawl June 24, 2024 : Aizawl City Local Council Association (ACLCA) chuan May 10, 2024 Thawhtanni-a ZPM Southern Headquarter Lungleia Chhung Inkhawm a hmanpuina a Health Minister thusawi, "VC te LC te kan mi leh sa an nih loh avangin min thawhpui tha duh lo a ní," a ti hí, kalphung thar Mipui sawrkarah hian thawhhopui tur emaw a min sawmna thu pawh la hriat loh laia ram hruaitu lu Health Minister in hetiang thu dengkhawng deuh mai a sawi chu pawi an ti.

ACLCA chuan Local Council khawtlang mipuiin kum 5 chhung atana kum 2020 September thlaa an thlan, khawtlang mipuite innghahna ber in-a an thawhpui theih loh anga sawi a ni hi pawi an ti a. VC leh LC te hi khawtlang leh ram thatna tur chuan State Sawrkar thawhpui tur hian a inhuam reng zawk a ni, an ti.

ACLCA chuan, "Ram leh khawtlang rorelna kawngah theihtawpa tan la tlang a, mipui Sorkar kalphung thar hnuaiah ke kan pen ho tur a nih laia, kan ram hruaitu lu Health Minister in thu dengkhawng tak, 'VC te LC te kan mi leh sa an nih loh avangin min thawhpui tha duh lo a ni,' tia a changtu Minister pawh nilovina a sawi hi, keini Aizawl City Local Council Association te chuan kan ngai thutak hle a. Health Minister hian Khawi VC leh LC in nge thawhpui duhlo tih min hriattir se kan duh hle a ni," an ti bawk.

Hetiang thusawi hi ram hruaitu hnen atanga an dawn tawh loh nan, Aizawl City Local Council Association chuan an veng/khawtlang thatna tur chuan eng hunah pawh ram hruaitute (State Sawrkar) hi an thawhpui thei reng a ni an ti.