JC Ramthanga chuan Serchhip District chhung Horticulture Cluster hrang hrang atanga tomato hralh chhuah tur thahnem tak thar chhuaktu lo neitute chu a lawmpui thu sawiin, an hlawhtlinna chu Horticulture Department hlawhtlinna a ni, a ti a. Covid-19 avanga ei leh bara harsatna kan tawh laia thlai tharlam hmanga Mizoram chawmtu Serchhip Mat phaia kuthnathawktute hmunhma a tlawh ve thei chu lawmawm a tih thu sawiin, thlai tharchhuah kawngah Mizoram intodelhna tura theihtawp chhuah a tum thu te, Mission for Integrated Development of Horticulture (MIDH) hnuaiah kuthnathawktute tan tanpuina awm thei ang angah te pawh theihtawp a chhuahsak tur thute sawiin, hlawk zawka thlai tharchhuak zel turin duhsakna a hlan a ni.

Khuallian hian Aizawla phurhthlak tur Serchhip District chhung Cluster hrang hrang atanga loneitu mi 18 te tharchhuah Tomato 33 Quintals (Sailulak atangin 7 qtls, Leng atangin 3.5 qtls leh Serchhip atangin 22.5 qts) chu Chawm kai atang hian a vailiam a ni.