Aizawl : Aizawl District Monitoring Committee chuan NHIDCL-ten Aizawl to Tuipang leh Seling to Zokhawthar kawng an laih mek chu enfiah nise an ti.

Aizawl District Monitoring Committee leh Aizawl DC ni bawk Dr. Lalhriatzuali Ralte hovin Zirtawpni khan tunlai a Mizoram chanchin luahtu pakhat kawng laihna leivung paih dan mumal loh avanga lui leh kawr a tihchhiat dan chungchang sawiho a ni a. Tun tumah hian Aizawl District chhunga NHIDCL in kawngpui an laih mek NH 54 Aizawl Tuipang road leh NH 06 Seling Zokhawthar road-a Seling to Tuirini en hmasak an rel a ni. 

NHIDCL hian NH 54 Aizawl Tuipang road-a Aizawl District bik hi Forest Clearance nei tawhin hna an thawk mek a. Hetih lai hian NH 06 Seling Zokhawthar erawh Forest Clearance dil mek a ni a. Seling Zokhawthar kawng hi Forest Clearance neih hma pawhin kawng siam hi nasa tak thawh lawk a ni a, he an hna thawh lawk laia leivung paih dan mumal loh avangin a chhehvel nasa taka tihchhiat chu a rang lama committee hian en ho an tum a ni. Dt. 2.6.2022 khan Laltlanhlua Zathang, DFO Aizawl leh Monitoring Committee-a Secretary chuan NHIDCL hnenah Forest Clearance nei lova an hnathawh chu chawl turin thu a pe a ni.

Aizawl District Monitoring Committee hi Aizawl District chhunga hmasawnna hnathawh hrang hrangin kan environment a tihchhiat venna kawnga hma latu tur an ni.