India ramah adventure bike tha tak tak a awm nual tawh a, a awm belh zel bawk. A thente chu manto tak takte a nih laiin mipui nawlpui ban phak man tlawm tha tak tak pawh a awm nual tawh. Chung zinga a langsar zual thenkhat kan tarlang dawn a ni. 

1. Hero XPulse : Hero XPulse te hi adventure bike ho zingah chuan man tlawm ber pawl a ni a, Rs. 1.23 lakhs (ex-showroom) atangin a intan. Hero XPulse 200 hi 199.6 cc petrol engine niin, tlangram hmun chhengchhe tak takah pawh a hman tlak zia hretuten an hmaih phal ta meuh lo. 

2. Yezdi Adventure : A man hi Rs. 2.09 lakhs (ex-showroom) atangin a intan a, tun hnaia tlangzarh thar a ni nghe nghe. A engine a  chak tha a, 334 cc a ni. Tlangram chheng chhia leh hmun kil khawr tak takah pawh hman tlak tura duan a ni a, belhchian a dawn hle tura ngaih a ni. 

3. Royal Enfield Himalayan : Hei chu a man pawh a to ve deuh a, Rs. 2.14 lakhs (ex-showroom) atangin a intan a, khalh nuam leh chak tha tak a ni. A hming ang ngei hian Royal Enfield Himalayan hian tlangram chheng chhia a ngam hle a, India rama adventure bike hralh chhuah hnem berte zinga a mi a ni - 411 cc petrol engine a ni. 

4. Benelli TRK 251 : Benelli hian Aizawl-ah pawh showroom an nei tawh a, mipuiin an hmelhriat chho mek. Benelli TRK 251 hi Rs. 2.51 lakhs (ex-showroom) atangin a intan a, company rintlak an nih zia mipuiin an hriat chhoh mek avangin hralh pawh a kal viau - 249 cc a nih a vangin adventure bike dangte aiin petrol a heh lo bawk. 

5. BMW G 310 GS : German automobile company lar BMW kutchhuak a nih tawh chuan a man a tlawm tak tak thei lo - an company rintlak zia lanna pakhat a tih theih bawk awm e. BMW G 310 GS te hi Rs. 3.05 lakhk (ex-showroom) man a ni a, adventure bike dangte ai chuan a man pawh a to deuh. He adventure bike hi 313 cc niin, chak leh khalh nuam tak a nih a rinawm.