DOWNLOAD OUR APP

Read latest news on your phone
app-store

Afghan hmeichhiaten an hmai an tuam leh dawn

May 08, 2022

Islam sakhaw lehkhabu thianghlim, Quran-ah chuan Muslim-te hi hmeichhia pawh, mipa pawh, an inthuamna tur uluksak an ni hle a. Mipate hi an lai atanga an khup thleng tal khuh ngei ngei tura ni a, hmeichhiate phei chu an chhungkhat emaw, an pasal emaw bulah a nih loh chuan an hmai, an kut leh an ke tih loh chu khuh vek tura tih an ni. Hetih rual hian an lehkhabua inziak hi an sakhaw chhungah pawh inhnialna siamtu niin taksa lang chin turah ngaihdan hrang hrang hrang a awm.

Afghan hmeichhiate chuan Islam sakhaw dan angin an hmai an khuh a ngai leh dawn ta a, hei hi an rama roreltu, Taliban helhovin dan thar an siam leh vang a ni.

Hmeichhia tupawh, he thupek zawm lo leh an chhungte zinga mipa hnena thuneituten warning an pek pawh palzam chu anmahni enkawltu (male guardian)-te chu  ni thum lung in tantir theih an ni ang.

Taliban hian an rorel hun hmasakah khan hmeichhiate hmai khuhna, burka an tih chu hman ngei tur tiin khauh takin an kalpui.

Nikuma thuneihna an chan leh hnuah erawh he dan hi tun thleng chuan an la hmang leh rih lo.

Tunah pawh hian Afghanistan hmun thenkhatah chuan burka hmang sa, a bikin khawpui lian deuhvah chuan an awm reng a; mahse, a tlangpuiin an sam khuhna atan an hmang deuh ber.

Tuna dan hman leh tur hi Taliban sorkara Ministry for the Prevention of Vice & Promotion of Virtue-in an siam a ni.

Taliban thuneitute chuan tuna kal dan tur an siam hi ‘thurawn’ tiin sawi mah se zawm lote laka tih dan tur erawh an zam tel thung.

Taliban hian ro an rel hmasak leh tunah pawh inkhuahkhirhna an kalpuiah hmeichhiate khawsak phung thlakna leh thununna a tam hle.

Afghanistan hi khawvel pumah zirnaa hmeichhia leh mipa thliar lansarhna awm chhun a ni bawk a, hei hian khawvel dem pawh a hlawhtir hle.

Hmeichhiate hi pawl sang deuh chin zir an khapsak a, ministry for women’s affairs pawh an titawp a, hmun tam takah chuan hmeichhiate hna thawh an phalsak lo bawk.

Hetih rual hian an Quran lehkhabua inziak hi an sakhaw chhungah pawh inhnialna siamtu niin taksa lang chin turah ngaihdan hrang hrang hrang a awm a. Hei hian hijab (Arabic-a ‘khuh’ tihna) leh niqab (‘tuam vek’ tihna) tih inkara hrilh fiahna a tam phah hle.Hijab hi puanbah, sam leh nghawng khuhna a ni a, niqab ve thung chu an mit bawr tih loh hmai pawh khuh vek a ni thung a. Hetiang hi chu abaya an tih, taksa pum khuh thei puan fual (robe) leh an hmai tuamna tur nen an inbei tlangpui.Burka chuan an hmai leh taksa pum an tuam vek a, an hmuh theihna tur awng a awm ve chauh a ni.

Share now