Sorkarin sipai lak dan tur kalphung thar a siam hi tun dinhmunah chuan duh lohna a nasain sorkar pawhin a buaipui ber a ni rih mek a. Duh lohna hi state pariatah nasa taka lantir niin Defence Minister Rajnath Singh, Home Minister Shah leh Army chief te chuan thlem tumin hma la mah se a la reh thei rih lo.

Telangana-ah chuan duh lotuten rel hala vantlang bungrua an tihchhiat avanga hnawh darh nana police silai hmehpuahah mi pakhat a thi.

Telangana Chief Minister K Chandrashekhar Rao chuan Secunderabad railway station-a police silai hmeh puah avanga tlangval kum 24 mi thi -chu pawi a tih thu a sawi a. State sorkarin Rs. Nuai 25-a a ral tur thu leh a chhungte zinga mi sorkar hna pek a nih tur thu a sawi.

Uttar Pradesh, Haryana, Punjab leh Madhya Pradesh-ah te pawh tharum thawhna a thleng a. Bihar-ah chuan Deputy Chief Minister Renu Devi-i in pawh beih a ni.

A duh lotute hian sipaia tan hun chhung tawi lutuk leh an chawlh hnua pension lawmman an la lo turte chu an duh loh langsar a ni.

Agnipath hi Thawhlehni khan hawn niin Army, Navy leh Air Force-a tang tur sipai lak dan tur a ni a, sorkar chuan sipai tihtunlaina tur leh sum renchem zawkna tur niin an sawi.

Inrinnia duh lohna lantirna avangin ram pumah rel kal tur 350 chuang chu an zin tur thulhtir an ni.

Uttar Pradesh-ah chuan tharum thawhna thleng avangin police-in mi 250 chuang an man tawh a, thubuai pawh tute nge an nih hriat loh 400 lakah siam a ni a, mi dang 150 pawh railways police-in thubuai an siamsak bawk.

Kerala-ah thalai sang rualin Thiruvananthapuram leh Kozhikode-ah kawng zawhin army recruitment exam buatsaih vat an phut thu an tilang.

Karnataka-ah chuan Dharwad-ah Agnipath duh lotuten kawng zawh an tum avangin police-in tiang nen an hnawt darh.

Bengal-a North 24 Parganas district-ah chuan duh lotuten rel kawng an dan avangin darkar khat chuang rel kal tur an din phah.

Haryana-ah mipuiin Mahendergarh railway station kawtah lirthei an hal a; Punjab-a Ludhiana railway station chu mi 50 rual velin an luhchilh a, bungrua an tichhe nual.

Rajasthan-ah pawh  Jaipur, Jodhpur leh Jhunjhunu-ah te duh lohna lantir niin an zinga mi thahnem tak man an ni a. Alwar-a hun reilo te chhung chu Jaipur-Delhi Highway dan a ni bawk.

Congress President Sonia Gandhi chuan Agnipath chu hawi lam nei lo inhruaina a nih thu a sawi a. Covid a kai avanga damdawi ina awm mek, Gandhi-i hian scheme thar chu a duh loh thu leh an party chuan hnuh kir a nih ngei theih nan an beih tur thu a sawi bawk.

Aizawl June 19, 2022 : India sorkarin sipai lak dan tur kalphung thar a tihchhuah duh lohna chuan state pariat zet a kan kai tawh mek laiin Inrinni khan kalphung tlem a tidanglam tih a puang.

Kalphung tharah hian Agnipath tia an sawi hmanga sipaia lak, ‘Agniveer’ an tihte hi kal dan tur anga kum li chhung sipaia an tan hnua an chhuahah an zinga mite chu Central Armed Police Force (CAPF) leh Assam Rifles-a an tan chhunzawm leh theih nan an tan seat 10% hauhsak an ni dawn a ni.

Union home ministry chuan Agnipath hmanga sipaia tangten paramilitary force chi hniha tan zui an tum chuan an kum bithliah pawh kum thumin a pawh zausak bawk.

Agniveer-a tang hmasa ber mite phei chuan an kum hi kum nga lai ngaihhnathiam an ni dawn ta tih puan a ni.

Agnipath hi duh lohna a nasat em avangin Union Home Minister Amit Shah chuan Agniveer-te chu CAPF-a an tan zui theih nan kawng zau tak hawn a ni dawn tih a lo sawi tawh a. Sorkar laipui hian scheme thar hmanga sipai \an tumte tan kum bithliaha kum 21 aia tam lo tih pawh kumin atan bik chuan kum hniha tizauvin kum 23 aia upa lo tiin a tidang lam a. Hei hi tun kum hnih chhunga sipai lak a awm loh vang a ni.

Tunah hian paramilitary force panga - Border Security Force (BSF), Central Reserve Police Force (CRPF), Indo Tibetan Border Police (ITBP), Shastra Seema Bal (SSB) leh the Central Industrial Security Force (CISF)-ah hna ruak 73,000 vel a awm.

CAPF leh Assam Rifles-ah hmun ruak 73,219 a awm bawk tih union Home ministry chhinchhiahnaah tar lan a ni bawk a. Union territory hrang hrangah police hna ruak 18,124 a awm bawk.

Home ministry hnuaiah hian sipai nuai 10 zet awmna, CAPF hi India rama hna nei lote hna siamsak tam ber pakhat a ni.