Aizawl: Nimin khan Agriculture Minister C. Lalrinsanga chuan Aijal Club-ah FOCUS Mizoram Project kalpui dan endiktu UN peng pakhat International Fund for Agriculture Development (IFAD) team te chu cultural programme a hmanpui.

He hunah hian IFAD mithiam Anton Glaser, Mission Leader chuan a ho ten tunlai hian Mizoram-in FOCUS project a kalpui mek dan te an en thlithlai a, rawtna leh kaih-hruaina te pe turin a ti a, FOCUS project in a huam- Champhai, Kolasib, Serchhip, Mamit, Saitual leh Khawzawl District ah te Mid-Term Evaluation an rawn tih mek thu a sawi. 

Agriculture Minister chuan thu sawiin Agriculture leh a kaihhnawih kawng hrang hranga Mizoram mamawh te phuhru tura nasa zawka hma lakpui turin IFAD mithiamte chu a sawm a. Minister chuan Mizoram hmalam thlirin kan tlangram duat tak chunga kan economy tih that theihna tur te, sik leh sa inthlak danglam chak tak avanga kan ram enkawl dan mumal zawk neih dan tur leh loneitute tan a hlawk zawka farming kalpui a nih theih nan Integrated 3-Tier farming System  mamawh a nih dan te IFAD mithiamte hnenah hian a thlen a. Mizoram Sawrkar chu IFAD tana a inhawn thu leh heng kan mamawhte tihhlawhtlin a nih theih nana chak lehzuala thawpui turin IFAD mithiamte chu a sawm a ni. 

Fostering Climate Resilient Upland Farming System —FOCUS Project ti a sawi — hi United Nations hnuaiah IFAD leh Mizoram sawrkar in kum 2018 January Ni 25 khan agreement ziaka kalpui tan a ni a. FOCUS Project hi USD Maktaduai 79.30 ( $79.30 Million) senna tur project niin he project in a tum chu tlangram lo neituten sik leh sa inthlak zel mila agriculture leh a kaihhnawiha hma-lakna an kalpui theih nana kaihhruaina leh an mamawh pek a ni.