Aizawl: Mizorama vawk natna leng mek African Swine Fever natna chu February, 2022-ah chuan a fihlim tawh an beisei tih AH&Vety hotute chuan an sawi.

ZALEN-in AH&Vety department thawktute hnen atanga thu a dawn danin African Swine Fever hi a ziaawm hret hret a, February, 2022-ah chuan a nih ang ang a nih tawh an beisei tih sawiin hemi hnu lamah chuan hmuhchhuah pawh awm mah se zeuh zeuh a hmuh chhuah chauh a nih tawh an beisei tih an sawi bawk. 

AH&Vety thawktute chuan ASF chuan Mizoram a chenchilh tawh dawn niin sawi mah se nasa taka thihna thlen ang chi chu a awm tawh lo turah an ngai tih an sawi a. 

Vawk pul hri dona kawngah Mizoram chuan nasa taka leng zel tur pawh an titawp theiah an ngai tih ZALEN an hrilh. Hetih lai hian ASF vangin nimin khan vawk thi an awm lo a.

African Swine Fever vang hian Mizoramah vawk 29,726 an thi tawh a, district 11-a khua 271-ah he hri hi hmuh a ni tawh bawk a. ASF rinhlelh vanga thi hi vawk 533 awm tawhin ASF vanga vawk suat tawh zawng zawng chu 10,380 an tling tawh a ni.

Khuangleng leh a chhehvelah Food and Mouth Disease nia rin a leng a, sial in haw mahse an thihpui lem lo a, sample lain result nghah mek a ni.