Aizawl July 9, 2023 : General Administration Department (GAD)-in Ainawn Veng (Govt. Complex)-a sawrkar quarters luahtu chhungkaw za chuangte chu ni 60 chhunga chhuak turin a ngen a, hetihlai hian quarter luahtuten sawrkar ngenna hi sut leh turin CM leh GAD hotute hnenah ziakin an thlen a, chhanna erawh an la dawng lo.

Government Allottee Welfare hruaitute hnen atanga ZALEN thudawn danin, quarter luah mektute hian hmun dang kalna tur an hriat chuan loh avang leh an awmna hmun chu a la him nia an hriat avangin chhuahsan an tum an la awm lo.

Tun hnaia quarters luahtuten resolution an siam angin, chief minister leh GAD secretary hnenah ngenna an thlen a, an thu thlenah chuan ni 60 chhunga an chenna chhuahsan tura ngenna chu July 15 hma ngeia sut leh an duh thu an tar lang a, quarters chhiate chu thiata a hmun ngaia sak that an duh thu te bakah quarters hmun hmate chu mi mal in saten an nek chep zel loh nan humhalh tlat an duh thute an tar lang.

June 22 khan GAD chuan sawrkar quarters type I, II, III leh IV luahtu chhungkaw za chuangte chu ni 60 chhung ngeia an chenna chhuahsan tura ngenna thuchhuah a siam tawh. 

June 18, 2023-a council of ministers thukhawm chuan Ainawn Venga sawrkar building/quarters-te chu chhiatrupna thleng thei pumpelh nan building-te tihruaha thiah nghal nise tiin thutlukna a siam a. He thuchhuak bawhzui hian June 22, 2023 khan GAD chuan thuchhuah hi a siam a ni.