Kum 2023 inthlanpuiah Mizoram mipui ten Zoram Peoples Movement party, Pu Lalduhoma kaihhruai chu sawrkarna siam turin hneh takin an thlang tling a. Sawrkar thar hian ram mipuite hmasawnna mai bakah hnathawh a dik leh dik loh, a that leh that loh, huntianm chhunga zawh ngei anih theihna tur mai bakah an hnathawh vil turin Mizoram State Project Monitoring Committee (MSPMC) chu sawrkarna an chan hnu lawk January 22, 2024 khan a din a. Chairman ah Chief Minister Lalduhoma niin Vice Chairman, Secretary bakah pawl hrang hrang aiawhte chu member atan dah an ni.

MSPMC pawimawhna leh mawhphurhna zingah hian Mizoram chhunga project kal lai te a hmunah kal a endik te, project hrang hrangte hun tiam chhung ngeia zawh a nih theih nan hma lak te, a tul thulha site inspection report atanga a hmunhma mil zeta estimate siamthat bakah PWD hnuaia Quality Control Division te nen thawh hova hnathawh a that leh that loh enpui te a tel a ni. He committee atang hian party thenkhat chu an in hnukdawk a, mahse hei hian an hnathawh a ti buai lem lo niin a lang.

Mizoram State Project Monitoring Committee hian Mizoram chhunga sawrkar sum hmanga hnathawh an endik tam tawh hle a, Aizawl khawpui leh a chhehvel mai bakah hmun hla tak taka hnathawh pawh an en fo tawh thin a. An hahin committee a tel te inpekna a fakawm tak zet a ni. Mizoram sawrkar hian hnathawh tha a duh a, tuna sawrkar mekte pawh hian an auhla ah 'ZPM hnathawh chu a tha bik tur a ni' ti te in an sawi thin anih kha. A dik tak chuan sawrkar sum hmanga hnathawhah hian a thawktu ten hlep hnem an tum lutuk nge hna hi a tha tawk lo hle thin a, a chang phei chuan department lam nen a ruka inremsiamna a awm em ni tih mai pawh a awl rum rum thin. Sum tam tak senga rotling tur din kawngah hna a that tawk loh avang leh a hun taka hnathawh zawh anih thin loh avangin sawrkar sum tam tak tul lovah a luang ral thin a. ZPM sawrkarin hemi tireh tur leh hna tha zawk a awm theihna atana Mizoram State Project Monitoring Committee an din pawh hian fak a hlawh viau a ni.

Sawi tawh angin MSPMC hi hmun hrang hranga hnathawh an endik vang hian an hah hle mai a, an thil hmuh dan pawh sawrkar thuneitute hnenah an thlen thin a ni. Hetih lai hian sawrkar lam atang hian ngaih pawimawhna a awm tawk lo nge ni tun thlengin thil diklo titute chunga hremna lek emaw sawrkar hmalakna hriat tur a awm lo hi chu a pawi hle. MSPMC hi sum tam tak senga din leh hnathawk a ni a, hetia an hmalakna leh hnathawhin ngaih pawimawh a hlawh lo anih chuan thiah leh mai pawh a that a rinawm. Politics hlawkna leh mipui laka lan mawi tumna mai atan MSPMC hi din ni lo se a lawmawm ang.