Aizawl; Vairengte Aitlang hmar lam, Assam ramri hnaiha Vairengte mi, hmunphiah huan nei chhungkaw 20-a mi 40 bawr velte chu Assam police (AP)-te laka harsatna an tawh lohna turin identity card siamsak an ni a. Hemi chungchangah hian huan neitu thenkhatte chuan anmahni huan, Mizoram chhung ngeia harsatna tawk loa an kal theihna tur ID card siam an ngai chu tlawmthlak an ti hle tih an sawi.

Vairengte mi, Aitlanga hmunphiah huan neitu thenkhatte chu Zirtawpni khan an hmunphiah huanah kal an tum a, Assam police hian kumin bikah an hmunphiah lak an phalsak dawn loh thu an lo hrilh a ni.

Hetianga Assam police ten harsatna an lo siam chu a pawi an tih thu huan lo ram neitute chuan an sawi a, vawiin thlengin an hmunphiah huanah an la kal chhunzawm lo nia thudawn a ni.

Hemi chungchangah hian Vairengte SDO (Civil) hoin police hotute nen hmunphiah neitute chu January 16, 2023 khan an thukhawm a. Thuneitute chuan Assam police duty-te an biakpawh tawh thu leh hmunphiahte an keh theih ngei tur thu hmuhphiah neitute an hrilh a. Vairengte SDO (civil) office chuan hmunphiah huan neitute chu ID card siamsakin, chu chu Assam police-ten ram neitu an ni ngei tih an hriatna tur leh an lo dan lohna tura tih a ni. 

Hmunphiah huan neitu thenkhat ZALEN in a biakte chuan ID card chu mi 40 bawr vel siamsak an ni a, anmahni huan, Mizoram chhung ngeia feh tura ID card a ngai chu tlawmngaihthak an tih thu te, an huante chu tunhma atanga an lo neih tawh a nih thu te leh mi ram hawh ang mai an nih tawh thu te an sawi.