Aizawl August 14, 2024 : PHE Minister Prof. Lalnilawma chuan vawiin khan Chanchinthar thehdarhtute a kawm a, he hunah hian PHE Department lam hotute chuan Aizawl-ah a pangngaiin tui a la haw theih rih loh thu an sawi a, pangngaia a haw hun tur an sawi thei lo.

PHE lam hotute chuan Cyclone Remal avanga chhiatna an tawh avanga an khawl chhia chu thuhran ni se, tui nu lutuk sawngbawl chu an harsatna lian ber a nih zawk thu an sawi. Tuna an khawl siamtir mek hi siamtha mah se, tui sem hi pangngai taka kalpui mai theih a nih tawh loh thu an sawi bawk.

Tui hi a ngai angin tunah hian pump theih pawh ni mah se, kalphung pangngaia kal leh tur chuan thla hnih tal a ngaih tur thu an sawi a, an kal mumal lohna a rei tawh avangin thawk leh khatah a pangngaia kal theih a nih loh thu an sawi.

Tui a nut avangin tui an khawlna Jackwell chu Chirh leh Hnawlin a hnawh thin avangin a khat tawkin Compressor leh Mud Pump hmanga tihfai reng a ngaih avangin duh angin tui a pump chak thei lo a, tui pump chhuah theih tawk tawka thenfai a ni. Hei hi GAWSS Phase I&II innghahna ber a nih hrih avangin a la bang Chirh tam tak te hi chawih chet ngam a ni tawh hrih lo a, Mipui tui mamawhna a san em avangin harsa tan chungin an pump lui hram hram a ni.