Aizawl August 21, 2023 : UNO-in khawvel huapa ni hman bik a neih World Entrepreneurs' Day 2023 chu vawiin khan entrepreneur thahnemngai kalkhawm ten Woodland Hills ah hlawhtling takin an hmang.

He hun hmanpuitu Angela Zothanpuii, Director - Labour, Employment, Skill Development & Entrepreneurship (LESDE) chuan "Mizoramah LESDE alo din hnuah kan phak ang tawkin hma kan la a. Entrepreneurship chawikan leh chawisan hi hna hmanhmawh a ni," tiin "Hma lakna tur tam tak a awm a, a theih ang anga thurawn min pe turin ka ngen che u a ni," a ti.

Hun hmanpuitu dang Mizoram Rural Bank chairman Sheryl Vanchhawng pawhin thu sawiin "Mizorama World Entrepreneurs' Day hman a ni ve chu lawmawm a tih thu a sawi a. MRB chu entrepreneurship chawikan nana pawimawh funding lamah theihtawk kan chhuah mek a ni," a ti.

Kalkhawm huaihawttu Joseph L. Ralte chuan "Kum 2010 atangin UN levelah khawvel pum huapin August ni 21 hi World Entrepreneurs' Day anga hman ṭan a ni a. Hemi ni hian entrepreneurs te intihhlimna leh sharing hun atan te an hmang a. Entrepreneur ṭha te chawimawina hun atan an hmang ṭhin. Kum lo awm leh zel turah hun hlimawm tak hman chhoh zel ni thei se ṭhaa a hriat thu a sawi.

World Entrepreneurs' Day ah hian Dr. Vanlalsiama Chhangte (Ebenezer Medical Centre) chuan Entrepreneurship lama Leadership pawimawhzia a sawi a. Danny Hmar MBA (IIM-A) chuan Marketing chungchang a sawi bawk.

He hunah hian entrepreneurs engemaw zat an kalkhawm a ni.