Aizawl; Aizawl DC office kang chhe ta sak thatna turin budget-ah cheng vbc. 20 dah ni tawh mah se sak that hun tur sawi theih a la ni lo a, hetihlai hian a hmaa a awm dan ngai anga sak that chu a harsat tawh rin a ni.

ZALEN thudawn danin Aizawl DC office sak that tur chungchangah Mizoram sawrkar PWD hnuaia Chief Architect office chuan design an siam a, an design chu approval lak tur la niin, approve turin vawi khat an thawn tawh a, chumi hnuah chuan tih that te pawh an nei leh tawh.

Chief Architect office chuan duhthlan tur (option) hrang hrang an siam a, hetihlai hian a hmaa building sak dan phung, architecture drawing/design etc. a awm loh avangin a hmaa building awm dan ngai ang chuan design an siam thei lo nia thudawn a ni.

Building hmasaah khan Aizawl DC office lam chu an leng tawh lo a, disaster operation centre-te an duh belh bawk a, hemi vang hian Chief Architect office chuan a chhawng turin drawing an siam chhin a, hetihlai hian tuna drawing an siam chu tihdanglam leh theih vek a la ni.

ZALEN thudawn danin kangmeiin a tihchhiat loh bung kung la dingte tichhe lo tura ruahmanna siam tum a ni a; amaherawhchu, building hmasa, tuna la ding te tihchhiat loh tak tak erawh a theih a rinawm loh a. Building hmasa lo sak dan technical document a awm lo a, chu chuan a hma ang chiaha sa tha leh turin harsatna a siam nia thudawn a ni.

Drawing siamtu, Chief Architect office chuan building sa tan turin tih fel ngai tam tak a la awm tih an sawi a, tuna drawing an siam te pawh la tihdanglam leh theih vek a nih vangin a sak dan phung tur pawh thutlukna siam fel a la nih loh thu ZALEN an hrilh.

Aizawl DC office hi December 17, 2021 zing dar 3:15 vel khan a kang a, In eng emaw zat a kang ral a. Kum 1890-ah luah tan niin, kum 131-a upa a ni.