Aizawl December 24, 2022: Aizawl Municipal Corporation (AMC) chuan Krismas leh Kumthar hlim leh lawm taka hmang turin Aizawl mipuite duhsakna an hlan a. Ruai theh nana hman khat daih plastic hmang lo turin ngenna an siam a, halpuah leh sawrkar phal lo thil te lei lo turin mipui an chah bawk. 

 Aizawl enkawltute chuan Ruai theh nana single use plastic hman chungchangah hlakhat kalta khan Kohhran te hnenah ngenna an siam tawh a, ruai buatsaihnan single use plastic, entirnan - disposable plate, disposable cup, disposable fork, etc,. hmang lo turin Kohhran leh pawl hrang hrang te an ngen nawn leh a ni.

AMC chuan Halpuah leh sawrkar khap thil dang, awrkarin khapna a lo siam tawh halpuah, halmawi, silai mu nei chi leh sky lantern te lei leh hralh lo turin mipui te a ngen a, Halpuah leh halmawi hal lo turin ngenna an siam bawk.

Bawlhhlawh sawngbawl chungchangah Kohhran, pawl leh mimalten ruai thehna ningnawi te AMC-ah dilna thlenin Solid Waste Management Center (SWMC), Tuirial-ah bawlhhlawh a paih theih tih an hriattir bawk.

Krismas leh Kumthar hlim leh lawm taka hman a nih theih nan sawrkar thuchhuah zawm a, midang tana harsatna siam lo turin ngenna an siam bawk.