Aizawl January 3, 2024: Vawiin khan Agriculture Minister PC Vanlalruata hovin Agriculture Department hotute chuan kum 2023-24 chhunga Scheme hrang hrang hmanga hmasawnna hnathawh an kalpui dan tur sawiho hun an hmang. Agriculture minister hian Aizawl kawtchhuah-ah Wholesale Market pali (4) din a nih tur thu a sawi.

Agriculture Minister chuan Agriculture Department-a thawktu te kumthar 2024 chibai bukin kut hnathawktute hmakhua ngaia theihtawp chhuah turin a sawm. Minister hian Agriculture Marketing lamah nasa taka hmalak a ngaih thu leh hemi ti hlawhtling tur hian a tul anga hmalak a nih tur thu a sawi.

PC Vanlalruata hian Thingtlang kut hnathawk ten an thlai thar awlsam zawka an hralhna turin Aizawl kawtchhuah ah Wholesale Market pali (4) din a nih tur thu a sawi bawk a. Department-in kut hnathawktute hamthatna tur Scheme hrang hrang a kalpui mek te awmze nei lehzuala kalpui a nih theih nan theihtawp chhuah turin officer kalkhawmte chu a chah bawk a ni.

Meeting hi Agriculture Secretary H. Lianzela chuan kaihruaiin, Vanlalthlamuana, Director, Agriculture Department-in an Department dinhmun tlangpui leh hmalakna te sawifiahna hun a nei bawk.