July 6, 2023;  Vawiin khan Aizawl Municipal Corporation (AMC)-in cheng vaibelchhe 10.59 senga a sak AMC Multi Complex Tuikual South Building chu Aizawl Mayor Lalrinenga Sailo in a hawng. 

Hawnna programme hi Er. Lalhriatpuia, Municipal Commissioner, AMC in a kaihruai a; building sak leh hawn kawngah harsatna hrang hrang paltlang a ni a, inphahhniamna nen indawr a nih hnuah chinfel a nih thu a sawi a. AMC hmalakna hrang hrangah Aizawl mipui tawiawmna an dawn that thin thu a sawi a, lawmthu a sawi bawk a ni. 

Khuallian leh building hawngtu Lalrinenga Sailo, Aizawl Mayor chuan thu sawiin, kum 2015 a Corporation a AMC hlankai a nih hnuah AMC in chak takin assets siam tura hma a lak thu a sawi a, hotu hmasate hmalakna a chhuanawm thu a sawi bawk. AMC chu mahnia inchawm thei tura tih a nih avangin Central Sorkar atanga a sum dawn a tlem telh telh a, chuvangin sum (revenue) lut thei thil rotling (asset) siam turin theihtawp a chhuah zel a tul thu a sawi a ni. AMC Multi Complex Tuikual South hi cheng vaibelchhe 10.59 chuang senga sak a ni a, a contractor in tha taka a sak thu a sawi a. A enkawl chhunzawmna kawngah AMC mai bakah vengchhung (Tuikual South) mipuite an pawimawh tur thu a sawi bawk a ni. 

Aizawl Mayor chuan AMC Multi Complex Tuikual South hi mi tamtak tana malsawmna thlen tu, eizawnna tamtak siam tur a ruahman a nih thu a sawi a. Lirthei Parking hmun, Bazar, Shop te a awm dawn thu leh a building chung bera Hall chu a hmang duh apiangin man chawia an hman theih tur thu a sawi bawk. Bazar hmun tura ruahmanah hian Mizoram rorelna sang ber, Assembly House bul kawngsira inpho thinte nuam zawka an thut theihna tura ruahman a nih thu a tarlang bawk. 

R. Lalmuanpuia, EE in Technical Report pein Property Tax tlingkhawm leh AMC fund dangte leh AMRUT fund hmanga phase tamtak a sak a nih thu a tarlang a. UT Building ni thin, a building a hlui tawh avanga luah ngam tawh loh chu AMC in GAD, Govt. of Mizoram dilin, phalna a neih hnuah thiatin AMRUT fund Rs. 296 lakh hmanga parking lot sak tan a nih thu leh AMC fund hmanga chhunzawm a nih thu a sawi a ni. A building hi 18 August 2017 ah sak tan niin 13 March 2023 khan zawh fel a nih thu a tarlang bawk. A building hi chhawng 7 (sarih) a ni.