Aizawl; July 1, 2022 atangin sawrkar laipui thupek angin hman khat daih plastic (single use plastic) khap tura thupek a chhuah chu Aizawla office tam zawk chuan an zawm tawh a. December, 2022 atangin plastic 120 micron aia pan hman khap a ni dawn.

ZALEN-in State Level Task Force Committee secretary leh Mizoram Pollution Control Board secretary ni bawk, C.Lalduhawma hnen atanga thu a dawn danin hman khat daih plastic kenkawh kawngah sawrkar office-ten an tih that viau laiin mipui lam erawh chuan an la zawm tha tawk lo deuh nia a hriat thu a sawi.

“Aizawl khawpuia office tam zawk chuan hman khat daih plastic hman lohna hmunah an inpuang tawh a, a then an inpuang mek zel a. Hetih lai hian mipuiah erawh zawm a la hlawh tawk loh deuh a; mahse, a vâng tan niin kan hria a. Hman a nih loh nan hma kan la mek a ni,” a ti.

Plastic thlakna a awm mai a rin thu sawiin C.Lalduhawma chuan, “Sawrkar chuan a thlakna siam chhuah lam hi buaipui kan tum lo a. A siam duh leh siam thei an awm chuan an bultanna atana sum mamawh lo buaipuisak kan inhuam a, hemi atan hian NEDFI leh NABARD-te kan be tawh a, an inhuam hle a ni,” a ti bawk.

Hman khat daih plastic chu hmang lo turin mipuiah inzirtirna neih mek a ni tih sawi bawkin he dan hi a nihna ang taka hman a nih hunah chuan dawrkai hmang lui an awm chuan an license tihtawp thlenga hrem theih an ni dawn niin a sawi.

C. Lalduhawma chuan tun dinhmunah plastic (polythene) 75 micron aia pan hman chu khap mek a ni tih sawiin December, 2022 atang chuan 120 micron aia pan hman khap a ni dawn tih ZALEN a hrilh bawk a, plastic chhah deuh te hi hman nawn theih an nih vanga khap hrih lo an ni tih a sawi.

Hetih lai hian mineral bottle ang chi erawh khap a ni hrih dawn lo a ni.