Aizawl; Aizawl Zoological Park ah Sakei (Bengal Royal Tiger) a nu leh a pa dah belh a ni dawn a, Nandankanan Zoological Park atanga lak tur niin, kumthar January thla chhungin Aizawl Sahuan ah lak thlen theih beisei a ni.

Deputy Conservator of Forest (Wildlife) Lalnunzira, IFS hnen atanga ZALEN thudawn danin, Nandankanan Zoological Park nen ramsa inthleng tawn (exchange programme) kaltlang a Sakei nu leh a pa an lak tur chungchangah, Central Zoo Authority (CZA) atangin phalna hmuh fel a ni tawh a, Sakei an lak tur te chu kum 5 a upa ve ve an ni. 

Deputy Consevator of Forest (Wildlife) sawi danin, Nandankanan Zoological Park atanga Sakei pahnih lak a nih rualin, Aizawl Sahuan atangin Savawm leh Hauhuk pek an ni ve thung dawn a. Ruahmana an siam danah nakum January thla chhungin Aizawl Sahuan lak thlen theih beisei niin, an awmna (Sakei dahna) turte cheibawl tur a la nih avangin hei ai pawh hian a tlai thei bawk.

Kumin February thla khan Guwahati Zoo atangin ramsa inthleng tawn kaltlangin, Aizawl Sahuana Sakei (keipui) dah hmasak ber ni turin lak a lo ni tawh a, a nu leh a pa lak tum a nih laiin, a nu chauh lak a ni a, kum 15 vel a upa a ni. Aizawl Sahuan atangin Guwahati Zoo hian kumin February khan Hauhuk nupa an la ve thung a ni. 

Sahuan enkawltute hnen atanga ZALEN thudawn danin, Sakei dah a nih hnuah Sahuan tlawhtu an pung a, tlawhtu an tam thin avangin a hmun hma (lirthei dahna) lamin a zo meuh thin lo. Aizawl Sahuan hi Pathianni ah khar thin niin, nidang zawngah hawn a ni.