January 17, 2024; ASER 2023 report a tarlan a nih danin, Aizawl-ah thalai 89% ten smartphone an nei a. Thalai 92% chuan smartphone an hmang thei.

Annual Status of Education Report (ASER 2023: Beyond Basics) chu vawiin January ni 17, 2024 ah New Delhi ah tih chhuah a ni.

Report a tarlan a nih danin, Mizoram ah chuan, ASER 2023 survey Aizawl khaw chhungah Diet (Aizawl) and Mizoram University a\anga volunteer ten an nei a. Aizawl-ah chuan kum 14-18 inkar thalai zinga 81.6% chu zirna inah mumal taka inziak lut an ni a, thalai 50% chu sorkar zirna in a inziak lut an ni. Thalai 18.4% chu khawiah mah an inziak lut lo thung, kum 17-18 inkar te chu kum 14-16 inkar aiin zirna in a in ziaklut lo an tam zawk a ni.

Kum 17-18 inkar zingah mipa 21.4% chu zirna in engmah-ah an inziak lut lo a, hmeichhia 15.5% an awm thung. 1.7% chu vocational training eng emaw berah an inziak lut a, 22.2% chu survey neih hma thla khat chhungin ni 15 tal hna engemaw (inchhung hna tih loh)-ah an thawk bawk.

Aizawl-ah chuan, thalai 89% chuan smartphone an nei a. Thalai 92% chuan smartphone an hmang thei tih an sawi a; mipa zingah 99.3% ten nei in, hmeichhiaah chuan 99.5% ten an nei a ni.

Smartphone hmang thei zinga mipa 42.5% chuan an mahni pualin smartphone an nei a, hmeichhia 40.8% nei an awm thung. 

Smartphone hmang thei zawng zawng zingah hian survey neih hma kar khat chhung khan 80.0% chuan zirna nena inzawm thil pakhat tal en nan an hmang a, social media eng pawh khawih a hmang 97.1% an awm thung.

Kar khat kalta a thalai tam zawkin social media an hman laiin, a tlem zawk chuan a safety features profile block, profile private-a siam, etc.an thiam a ni, Aizawl-ah chuan 88.8 % chuan digital task ti turin smartphone an rawn keng thei a ni, heng zinga 85.8% chuan alarm set dan an thiam a, 73.5% chuan internet browse-in information an zawng dan an thiam a, 39.9% chuan Google Maps hman dan an thiam a, 97% chuan YouTube-a video zawn dan an thiam bawk. Digital task zawng zawngah hian hmeichhia in mipa an phak lo hle.