Aizawl; Mizoram sawrkara Food Civil Supplies & Consumer Affairs (FCS&CA) leh Aizawl Municipal Corporation (AMC) hmalaknain Aizawl veng pum puiah gas home delivery kalpui turin hmalak mek a ni a. Hetihlai hian tun dinhmunah Mizorama gas connection awm zat chu 3,25,121 niin, gas subsidy a la tawp lo a, KYC leh connection fel loah erawh subsidy a lut tha lo nia thudawn a ni.

Mizoram Consumer Union (MCU) General Secretary A. Lalhmangaihzuala hnen atanga ZALEN thudawn danin Aizawl veng zawng zawngah gas home delivery kalpui vek tum a ni a, chumi atan chuan tun dinhmunah pilot project atan veng 34 thlan a ni a, awareness pawh May 19, 2022 thleng neih tur a ni. 

MCU GS sawi danin home delivery kalpuina man Rs. 70 zel bituk a ni a, Aizawl veng pum puia kalpui theih a nih hunah chuan Rs. 50-ah tihhniam tumna a awm bawk.        
Pilot project atana thlan zingah home delivery phur vak lo vengte pawh an awm nia hriat a ni. MCU GS chuan ZALEN zawhna chhangin gas subsidy a la tawp lo tih a sawi a, tuna subsidy lut zat chu Rs. 144 a nih thu leh lut tha lote chu mahni gas connection leh KYC en fela agent-te hnena complaint turin an chah.

Gas home delivery hi kum 2019 atang khan veng pali, College veng, Dawrpui, Falkland leh Zonuamah te kalpui a lo ni tawh.

District        Connection    Agency

Mamit         15,470        3
Kolasib        17,631        5
Aizawl         1,64,128     25
Champhai   31,275        6
Serchhip     17,070        4    
Lunglei        55,202        8
Lawngtlai    10,574        4
Siaha           13,771        2