DOWNLOAD OUR APP

Read latest news on your phone
app-store

Amazon-a chawlhkar li dawn mipa naupang unau bo hmu chhuak

Mar 18, 2022

Khawvela ram ngaw chhah ber, Brazil-a Amazon ngawpuia mipa naupang unau bote chu chawlhkar li dawn zawn an nih hnuah damin hmuh an ni a, rei tak khamkhawp thil an ei tawh loh avangin an chhiain an chau hle a, damdawi inah enkawl mek an ni. Sorkar lam pawhin an zawn beidawn tawh hnuah thing kittu pakhatin a hmu hlauh a ni.

Brazil-a Amazon ramngawa chawlhkar li chhung zet bo tawh mipa naupang pahnih, unau chu dama hmuh an ni ta a, damdawi inah lak nghal an ni.

Amazon-a cheng mipa naupang pahnih, Glauco leh Gleison Ferreira, kum riat leh ruk mite hi Manicoré, Amazonas state-a ramhnuaia sava tê chi man tura an kal chu February 18 atang khan an bo a ni.

Tual chhung mi pakhat, thing kita ei zawngin Thawhlehni khan a hmu chhuak ta hlauh a ni.

An bo chhung hian ei tur khamkhawp an ei loh avangin an chau hle a, damdawi ina enkawl deuh an ngai a ni.

Mipa naupangte hi an bo veleh hian a bul hnaia chengte chuan chawlhkar eng emaw zat chhung an lo zawng tawh a ni.

An bo hun hi Amazon-a fur lai, hun dang zawng aia kal leh chet vel a harsat lai a ni a, an hmu zo mai ta lo reng a ni.

Emergency service pawhin February 24 khan a zawn hna hi an titawp tawh a; mahse, tual chhung mite chuan an zawng zui rneg tho niin tual chhung chanchinbu, Amazônia Real chuan a tar lang.

Chawlhkar li dawn a liam hnuah ram humhalh lai, Lago Capanã-a naupangte khua, Palmeira atanga km 6 vela hlaah thing kita chhuak pakhatin a hmu ta nawlh niin Amazônia Real hian a tar lang bawk.

Naupang pakhat zawk hian an bul lawka thing kit thawm a hriat chuan puih an ngaih thu a aupui a. An thawm hriaa ngaihven vatin a va hmuh chuan leia muin, riltam leh chau takin, an vun pawh khawro takin an lo awm a ni.

Tual chhung chanchinbute chuan an bo chhung hian engmah an ei lo va, tui pawh ruah tui chauh an in niin an nu leh pate hnenah an sawi tih an tar lang.

Glauco leh Gleison te hmuh an nih hnuah hian Manicoré-a damdawi inah lak an ni a, Ningani tuk khan Manaus khawpuiah helicopter hmanga phur luh leh an ni tih Globo chanchinbu chuan a tar lang.

Tun hi Amazon ramngawa mi bo an awm vawi khatna a ni lo va. Nikum January pawh khan pilot Antonio Sena chu hmun kilkhawr taka a thlawhna a tak hnuah ni 36 zet a lo vakvai tawh.

Kum 2008 pawh khan helai vela cheng rawlthar kum 18 mi chu a sa pel a bo tawh bawk a. Ni 50 zet hnuah hmuh a ni a; mahse, an hmuh hnu lawkah a thi zui niin Amazônia Real chuan a tar lang.

Share now