Brazil a ngaw chhah tak Amazon Rainforest-ah feet 36 a sei whale an chhar nawl mai. An chharna hmun hi whale te chenna hmun atanga mel tam a nih vangin Scientist te rilru a buai.  

Amazon rainforest hi nungcha chi hrang hrang te tual lenna a ni tih chu kan hre vek a, mahse he whale ruang avang zet hi chuan wildlife expert leh biologists te pawh an hrilhhai a, mak an ti hle a ni. Brazil-a Marajó thliarkara ton 10 zeta rit humpback whale ruang an chhar nawlh hi chu a mak ve thlawt a ni. 

Rin dan pakhatah chuan, he nghapui hi tuipuiah thi tawhin tui fawn chak tak chuan lain khawmualah hian a dah a nih an ring a, thenkhat chuan a thi tur chalchang hi khawmualah a vak chhuak a nih an ring bawk. Mahse, sangha leh tuipui chanchin hrechiang te erawh chuan an ring ve thei lo thung. A chhan chu Whale ruang an chharna hmun hi tuifinriat atangin a hla mai bakah tui chhungah lo chuan sangha te hi an thawk theih loh vangin hetiang chen chen hi a vak theiin an ring lo. 

Tualchhung a inbun, Bicho D’agua Institute, Marine specialist te chuan nghapui ruang hi an zirchian thuak hnuah he whale tuai thihna hi a la rei lo hle tih an hre tawh a ni. Project leader Renata Emin chuan,“He hmuna a rawn awm nawlh dan erawh kan la hre chhuak thei lo va, mahse rindan kan nei a, he whale hi a thih dawnah vaukam lamah rawn tla-in tui fawnin a len chhuak ang a, chutah tui fawn natakin thui zawkah a theh chhuak leh a nih kan ring deuh ber," a ti. 

Humpback whale te hi nipui laia hmuh thin an ni a, a chang changin Amazon luipuiah hian an lut ve thin a ni. Emin rin dan chuan he whale tuai hi a pui lak atanga tla hrang hlim a nih a ring a, mahse tun thlengin a thih dan leh thih chhan erawh an la hre chhuak thei lo thung. 

“A ruang awmna hmun hi chirh dum hmun a nih a vangin mihring tan pawh thlen mai harsa tak a ni a, bulldozer tan pawh kal ngaihna a awm loh vangin hman theih a ni lova, a ruang pawh senghawi hleihtheih a ni," tiin Silva chuan a sawi. 

Whale ruang hi a len tehreng nen hmun fai lai awmin a bul vela hnim leh thing vel pakhatmah tihfai chap ngai lovin hmun fai laiah a zal a, researcher lam pawhin a ruang chu a puma phum lovin a ruh te chu an la chhuak a. Heng a ruh te hi Belem hmuna Goeldi Natural History Museum-ah chik zawka enfiah turin an thawn dawn a ni. Heng zir chianna chuan he vanduaina hi eng tianga thleng nge tih an hmuhchhuah theih ngei an beisei a, tunah rih chuan tumahin a chhan hi an hre thei rih lo.