Aizawl : Dr. Ambedkar Foundation-in Scheduled Castes leh Scheduled Tribes ten damlo inenkawlnaa hamthatna an neih theih-na tura an kalpui, 'Dr. Ambedkar Medical Aid Scheme' chu Aizawl khawpuia damdawiin te hman dan a inang lo a, Aizawl Civil Hospital chu an blacklist rih.

He scheme kalphungah chuan hnam hnufual kum khata nuai 3 la tling lo ten, Kal, Lung, Thin, Cancer leh Thluak-ah te zai an ngaih emaw, dialysis/ Chemotherapy / Radiotherapy emaw kawchhunga taksa peng (organ) thlak a ngaiin an pui thin a, cheng nuai khat atanga nuai 3.5 thlengin Dr. Ambedkar Foundation hian an pui thin a ni.

Civil Hospital atanga ZALEN thu dawn dan chuan he scheme kalpui leh thei tur hian hma an la mek tih an sawi a, hetianga black list an nih chhan chu Dr. Ambedkar Foundation lamin a kalphung tura an duan an zawm famkim loh vang niin an sawi. Civil Hospital hian an damlo te aid (puihna) hmuh atang hian pawisa an cut sak thin a, hei hi scheme kalpuitu te beng a thlen avangin he scheme hi an tihtawp sak niin sawi a awm a, hetihlai hian Civil Hospital lam chuan pawisa kim lova an pek ngai loh thu leh an damlo te chu cheque-a pek thin an nih thu an sawi. Mitthi tawh hnenah pawisa an pe ngai lo a, an dam laia an enkawlna chin erawh an pawisa dawn atang hian an pe thin tih leh a bang chu an kir thin thu an sawi bawk.

He scheme kalpuitu, Aizawl-a hospital pathum zinga pakhat Ebenezer Hospital atanga ZALEN thudawnna chuan Dr. Ambedkar Medical Aid Scheme hi an kalpui chinah a tir lamah buaina an neih thu a sawi a, Utilization Certificate a ngai tih an hriat loh avangin an dilna a hlawhtlin lo fo a, an thawn chinah chuan buaina an neih lem loh thu leh an damlo te pawisa Dr. Ambedkar Foundation-in an rawn pek zat ang chu an account atangin an pek mai thin thu a sawi. Bill a rawn thlen tawh chuan a diltu te chu a rawn thleng ang ang an pek thin thu leh mi thi tawh pawh an pe lo ngai chuang lo tih a sawi.

Aizawl Hospital chuan Dr. Ambedkar Medical Aid Scheme chu kalpui hmasa ber pahnih zinga pakhat an nih thu leh buaina an neih ngai loh thu an sawi rualin an hospital kaltlanga he tanpuina dil te zawng zawng erawhin an hmuh vek loh thu an an sawi. Damlo bill rawn chhuah hmaa thi an awm chuan an bill hi Dr. Ambedkar Foundation lamah hian an thawn let leh mai thin thu a sawi a, hei hi a nihna leh he scheme kal pui dan tur a nih thu ZALEN an hrilh.

Dr. Ambedkar Medical Aid dilna hi anihna takah chuan damlo te teatment/surgery tih sak an ni hma ni 15-ah Director, Dr. Ambedkar Foundation, 15, Janpath, New Delhi, a thleng ngei tura tih a ni, amaherawchu, Aizawl lam atanga buaipuitu hospital lam hi chuan hetiang diak diak hian an kalpui lo a nih hmel. Damlo te hian zai emaw enkawl emaw (Surgery/dialysis/ Chemotherapy / Radiotherapy) an tih hma ngeiin tanpuina hi an dil tur a ni a, mahse, hei hi a remchan loh avangin hospital te hian a tul angin thil an kalpui mai thin. He scheme hi India ram hospital lian te chuan an kalpui deuh vek a, anni bakah hian State hospital leh an hriatpuia din hospital te pawhin heng natna te hi an enkawl theih chuan an kalpui thei bawk a ni.