Aizawl August 19, 2024 : MNYF leh MPYCC te chuan vawiin khan Cyber Crime-ah AMC Corporator hlui John Zosangliana Ralte (L) chungchang Social Media-a ziaktu Gilbert Ralte lakah FIR leh Criminal Complain an thehlut.

Gilbert Ralte hian "Chanmari West ten Vaibelchhe 15 an chan !!! Chanmari West Mipuite tan a va uihawm em em ve!!" tih thupui hmangin Article a ziak a, he article-ah hian Chanmari West hian Market Building an neih loh avangin K. Sapdanga chuan Inthlan laia a tiam ang tih a sawi angin ZPM sawrkar khan a bawhzui nghal a. A dept. Enkawl Smart City (UD&PA) atangin Pawisa Vaibelchhe 15 chu Chanmari West Bazar sak nan a sanction a, Chanmari West-ah amah ngeiin a puang tiin a ziak.

"He bazar hi Parking/garrage, Warehouse hi awm vek tura ruahmanna siam a ni a. He Bazar hmun tur LSC pass hi MNF AMC corporator khatihlaia ni mek John-a (L) khan a pe chhuak duh tlat lo a ni. (MNF local council te hian an LSC hi MNF AMC Corporator hi an kawl tir a ni)," tiin a ziak a ni.

"Hetiang a nih takah chuan, vawi tam tak AMC corporator hi dil leh ngen a nih hnuah pawh Chanmari West Market sak a duh miau si loh ah chuan, Smart City atanga pawisa hi lapse mai theih anih vangin, Hmun dangah Sawrkar chuan hreh tak chungin a divert ta a ni," tiin Gilbert Ralte hian a ziak bawk a ni.

Gilber Ralte hian, "Chanmari West mipuite chuan bazar building ropui tak tur an chan ta a ni. Hei vang hian AMC-ah Chanmari West mipuite hian vote lam ah 'change' an thlen tir ve ngei a rinawm hle !!?? RAM leh HNAM HMASAWNNAN PARTY rilru dah that fo a ngai thin. MNF party hian Mahni party hamthatna chiah an zawn thin hi bansan se a tha hle mai," a ti zui bawk.