Aizawl January 17, 2024 : Aizawl Municipal Corporation (AMC) in Aizawl khawpui huam chhunga vawk vulh khuahkhirhna dan a kalpui turah engemaw harsatna bik nei te tan vulh chhunzawm dilna January 2024 chhungin dil theih a ni a. dilna te hi AMC thawktute leh Local Council ten endikin harsatna bik nei te chu hun pekbelh theih a ni dawn.

Vawiin ni 17.1.2024 (Nilaini) chawhnu dar 1 khan AMC Auditorium, Thuampui ah vawk khuahkhirhna chungchang hi Aizawl khawpui chhunga Local Council aiawhte chu AMC thuneitu ten an sawipui a. He hunah hian thu sawiin AMC Mayor Lalrinenga Sailo chuan, "Aizawl khawpui hi thianghlim, fai leh hrisel taka kalpui kan tum a. Hetih lai hian vulh laklawh, harsatna nei bik te tan chuan khawngaihna hun hawn a ngai a. Mahse hei hian kum khuaa vulh theihna tur ni lovin engemaw hun chhung bik atan chauh a ni," a ti.

AMC hotute sawi danin harsatna bik nei te tan vulh chhunzawm dilna hi AMC ah thehluh tur a ni a. Dilna hi February thla ah AMC leh Local Council ten an enfiah ang a, harsatna bik nei te chu hun engemaw ti chhung atan vulh chhunzawm phalsak an ni dawn a ni.