ZALEN Aug. 1, 2024; AMC in Bawngkawn leh Durtlang Leitan inkar kawnga dan loa in sa lui lakah dan anga hmala turin Bawngkawn PS ah thubuai an thehlut.

Lalhruaisanga, Chawntlangpui, Lawngtlai District a mi chuan Bawngkawn leh Durtlang inkarah insakna tur lei laiin a lei a laih hian leimin nasa tak a thlen a. He chhiatna thleng hian mipui tana harsatna a siam avang hian AMC chuan pawi a ti hle a; mipui tan harsatna nasa zawk a thlen tawh loh nan theihtawpin hma a la zui zel a ni.

AMC thuchhuah tarlan danin, July ni 25, 2024 khan AMC official te chu Bawngkawn leh Durtlang Leitan inkar kawngte a hmunah tlawhin Protected Area-in a huam chinte chiang zawka hriat a nih theihnan teh that a ni a. July ni 26, 2024 khan Municipal Commissioner hovin AMC Enforcement Staff ten inspection nei lehin dan lo anga in sa te enfiah nghal a ni a. Gauhati High Court PIL (Suo Moto) No. 2/2024 thuchhuak zawm lova in lo sa lui mek K. Zasanga, Ramhlun North chu a insak tawp nghal tura hriattirna “Stop Development Order” pek nghal a ni. K. Zasanga hian a in sak hna hi tawp tura tih a nih hnuah pawh a chhunzawm leh tih hriat a nih avangin August 1, 2024 khan dan anga a chunga hma la turin Bawngkawn Police Station ah AMC chuan FIR a theh lut a ni.

Gauhati High Court thuchhuak, Bawngkawn leh Durtlang Leitan inkar kawng dunga in sak phalna neia in sa mek floor khat pawh la sa zo lo te, in sa mek ten an chawlh san ngei em tih te, dan phalloha hma thar lo la te an awm em tih leh Petrol Pump tura laih mek tawp tura a tih chuan a tawp san reng em tih te enfiahin July 30, 2024 khan AMC hmalaknain, AMC, Aizawl DC leh Aizawl SP aiawh ten Joint Inspection an nei a. Hemi ni hian tumah Court thuchhuak bawhchhiaa hma lo la an awmlo niin hriat a ni.

Site Inspection neihnaah hian phalna nei loa Protected Area chhunga in sa mek leh sa zo tawhte enfiah nghal a ni bawk a. Tunah hian Bawngkawn leh Durtlang in kar kawng Protected Area huamchhungah hian dan bawhchhiaa in sa mek leh sa zo tawh mi 12 an awm mek tih hriat a ni a. Heng zinga mi panga te chu an in thiat tura tihna Demolition Order pek an ni tawh a, an zinga pakhat chuan thupek zawmin May 8, 2024 khan a thiat tawh a. Thupek zawm lo mi pali te chungah pawh hma la chhunzawm leh turin AMC chuan a buaipui mek a ni, in sa thar zinga mi pasarih dang te chu an in sak mek/ sak zawh tawh te chu thiah sak turin hma lak mek a ni a, dan anga insawifiah tura hriattirna (show cause notice) pek an ni tawh bawk.