Aizawl; Aizawl Municipal Corporation (AMC) chuan chhiatna leh nunna chân palhna a thlen lohna turin July atanga October chhungin lei laih leh leivung hmanga ruam/kawr chhun khah a khap dawn. Thudawn danin, cheng nuai 1 thleng a inchawitir theih a ni dawn a, lungin tan thlengin inhrem theih a ni dawn.

May 19, 2022 khan AMC a Municipal Commissioner H. Lalhmingthanga chuan ‘notification’ a chhuah a, chuta tar lan a nih dan chuan, Mizoramah furpui laia lei laih avangin chhiatna leh nunna chan palhna a thleng tawh thin tih tarlan a ni a, chutiang thil a thlen tawh lohna turin AMC chuan lei laih phal loh hun chhung siam tulin a hria a, Regulation 10 of the AMC (Site Development & Slope Modification) Regulations, 2017-in thuneihna a pek ang leh mipui him tlanna turin AMC chuan AMC area huam chhungah July atanga October chhungin lei laih leh leivung hmanga ruam/kawr chhun khah a khap thu leh, thupek bawhchhiate chu dan angin an chungah hremna lek a nih tur thu tar lan a ni.

AMC hotute chuan khapna thupek an siam chuan sawrkar leh mimal pawh a huap vek dawn tih an sawi a, central military force lam erawh an danin a huam lo tih ZALEN an hrilh. Hetihlai hian tun dinhmunah mi mal leh sawrkar hnenah lei kaihhnawih development works thawh phalna pek chhuak zel a la ni a; amaherawhchu, kumin July-October chhungah erawh chuan phalna pek theih a ni tawh dawn lo thung.

AMC thupek dan zawm lote hremna tur pawh ‘notification’ a chhuah nghal a ni. HREMNA hi  - a)  500 cu.m hnuai - Rs. 5,000 ;  b) 500-1000 cu.m - Rs. 10,000
; c) 1000 cu.m chung lam - Rs. 5/- per cu.m bakah (a) & (b) a hremna telin.