Aizawl: Aizawl Municipal Corporation (AMC) chuan krismas leh kumthar lo thleng tur pualin, Aizawla veng hrang hrangte kawn/ kawtthler cheimawi turin a ngen a, cheimawi zual 20 thlan chhuah local council/vengte Rs. 50,000 theuh a pe dawn.

AMC hotute hnen atanga ZALEN thudawn danin, kumin Krismas leh kumthar lo thleng turah kum danga lo tih thin tawh angin, local council bultumin veng tinah committee din theih a ni dawn a, kawn/ kawtthler cheimawite chu endik tur niin, a ti tha 20-te hnenah pawisa fai Rs. 50,000 theuh pek an ni dawn a ni.

Covid 19 hripui leng vangin tunhnai 2020 leh 2021 kumah te Krismas leh kumthar vuakvetah kawn/kawtthler chei theih a nih loh hnuah, kuminah chuan AMC ruahmannain veng/kawtthler cheimawi a ni chho dawn a, vengchhung kawn cheimawi lawmman siam hnuhnun ber chu kum 2019 krismas leh 2020 kumthar kha niin, tourism department huaihawt a ni a, lawmman pakhatna dawngtu Chaltlang niin, pawisa fai Rs. 5,00,000 an dawng.

Lawmman pahnihna latu Bungkawn vengin Rs. 3,00,000 leh pathumna Mission veng in Rs. 2,00,000 an dawng a, veng dang panga, Tuikhuahtlang, Durtlang, Khatla East, Ramhlun South leh Tlangnuam West ten consolation prize Rs. 50,000 theuh an lo dawng tawh bawk.