Aizawl; Aizawl Municipal Corporation (AMC) chuan property tax atangin Rs. nuai 1,193.07 a hmu tawh a, AMC hian mi 5,854 hnenah insak phalna a pe tawh bawk.

Aizawl Municipal Corporation hian kum 2015-16 leh 2019-20 chhungin property tax atangin cheng nuai 1,193.07 hmu tawh a, 2020-21 atan khawn chhunzawm mek niin kumina property tax atanga sum lut zat hi hriat a la ni lo. AMC hian June 1, 2018 atanga nikum kum tawp thleng khan AMC Building Regulations hnuaiah mi 5,854 in sak phalna a pe tawh bawk a ni.

ZALEN zawhna chhangin AMC town planner Ralthuama Ralte chuan tun hnai kum 2 leh a chanve chhung velin AMC huam chhungah in sak dil mi 6,628 an awm tih a sawi a, dilna lut zingah enfiah mek 683 a awm a, dilna hnawl 29 (reject) a awm bawk. AMC town planner sawi danin in sak dil dan dik lo leh dan bawhchhiaa in sak vanga chawlh lailawktir mi 30 bawr vel an awm niin a sawi a. AMC huam chhunga in sa tur reng rengin AMC-ah phalna an lak a ngai a, in thiat tur pawhin phalna lak a ngai.

AMC thawktute hnen atanga thudawn danin kum 2015-16 leh 2019-20 inkarah pro-perty tax atangin cheng nuai 1,193.07 an hmu tawh a. Kum 2015-16 atanga khawn tan property tax-ah hian sum hmuh zawng zawng zaa 80 (80%) hi mipuite hmasawnna hna thawhna atan mipuiah pek let leh thin a ni.

Property tax hi kum 2015-16 ah cheng nuai 114.18 hmuh a ni a, 2016-17 ah cheng nuai 220.03 hmuh niin, kum 2017-18 ah cheng nuai 275.85 hmuh a ni a, 2018-19 ah cheng nuai 284.70 leh kum liam ta 2019-20 chhung khan cheng nuai 298.94 hmuh a ni.