May 24, 2022; Aizawl Municipal Corporation (AMC) chuan sawrkar kum kalta leh a hmalama property tax pe lote tan, hremna (penalty) chawi lova tax ba pek theih hun (grace period) a hawng mek. He hun hawn chhunga property tax pe lote chuan penalty 10% an pek tel a ngai tawh dawn.

AMC in hriattirna a tihchhuah a tarlan a nih danin, grace period hi May-July, 2022 chhung a hawng a, sawrkar kum 2021-22 leh a hma lam a property tax pelo zawng zawng ten AMC Office, Thuampui, Aizawl ah office hour chhungin pek theih a ni.

Grace period chhunga pe lote chuan penalty 10% an pek tel a ngai tawh dawn a, hengte bakah hian property tax pe lote chuan AMC a mamawh an dil kawngah harsatna an tawk a nih pawhin an sawi buai thei lo ang.

Tarlan tawh angin, AMC chuan kum 7, 2015-16 leh 2021-22 chhungin property tax atangin cheng nuai 1839.42 an hmu tawh a. Kum liam ta 2021-22 chhung khan cheng nuai 321.71 an hmu a, kum kal mek 2022-23 ah target cheng nuai 400 an nei. 

AMC huam chhungah property tax 3% lak thin chu, 2022-23 atangin 3.42% a lak tur a ni tawh dawn a, a sanna tur hi 0.42% a ni. Property tax hi mimal leh sorkar in (building)-ah a hlutna chhutin (unit area value system) khawn a ni a, sorkar laipui building-ah chuan khawn a ni lo.