Aizawl June 23, 2024 : Aizawl Municipal Corporation (AMC) chuan Aizawl khawpui chhunga vawk vulh khuahkhirhna dan a siam chu ennawn an tum.

ZALEN zawhna chhangin AMC hotute chuan vawk vulh kaihhruaina chuan harsatna a siam nia a lan avangin Deputy Mayor R. Thanglura kaihhruai ennawn tur committee din a ni a, he committee-ah hian corporator pahnih, Malsawmzuala leh Lalchhandami te chu member an ni.

Thudawn danin committee hian vawk vulh kaihhruaina siamah metre 100 huam chhunga mi dang an awm tur a ni lo tih leh thil dang en that ngai a awm nia a lan vangin hmalak tum a ni tih an sawi a. Tun dinhmunah vawk natna chi khat, African Swine Fever a len mek avangin hmalak theih a ni hrih lo a, hri leng a reh veleh hmalak an tum tih an sawi.

June 8, 2023-a AMC Board of Councillors meeting neihin thutlukna a siam tawh angin Aizawl khawpui chhung a lo thianghlima mipui an lo hrisel zawk nan leh lei min avanga chhiatna a lo thlem zawk nan mihring chenna in atanga feet 100 aia hnaiah vawk vulh khap a ni a. He khapna hi January 15, 2024 atanga hman tan a ni.

He kaihhruaina chungchanga harsatna bik neite chuan local council leh an chenna in hnai berte phalna lain AMC-ah ngaihnathiamna a dil thei a, local council kaltlangin AMC-ah dil siam tur a ni.

Vawk vulh khapna dan zawm lote chu Mizoram Municipalities Act, 2007 hmangin hrem theih an ni a. Thudawn danin vawk vulh chhunzawm phalsak dil hi mi 8,017 an awm a ni.