Aizawl : Congress Bhavan, Aizawl-ah 30/11/2022 khan Congress Party chuan ‘Thuneihna Semzai’ chungchang zirhona an nei a. He huna sawi hawnna hmangtu Dr. Lallianchhunga chuan, "AMC kal dan ang hi chuan khawpui danga Municipal sawrkar din belh zel tur chuan mipui rilru hneh a harsa tulh tulh ang. Mipui phur tirittu anga an hmuh zel hi a hlauhawm khawp mai," a ti.

Dr. Lallianchhunga hian ‘Thuneihna Semzai chungchanga sawrkar kal tawh te hmalakna leh hmachhawp la awm te,’ sawi hawnna neiin, “Thuneihna semzai (decentralization of power) hi ram hmasawnna atana rahbi pawimawh berte zing a mi a nih bakah, mipui sawrkar (democracy) sawhnghehna atana a kila lung pawimawh berte zinga mi a ni a. Mipui tan tel vena tur a siam tam a, langtlang (transparent) takin thil a tih loh theih loh va, chu chuan eirukna (corruption) a ti tlem a, ramin hma a sawn phah thin a. Sawrkar tha siam tur chuan thuneihna semzai hi tihhlawhtlin ngei ngei ngai zing a mi a ni” a ti.

Mizoramah Notified Town 23 a awm tih sawiin, Congress Media Chairman chuan, “Notified Town zingah Lunglei-ah Municipal Council din theih a ni a. Municipal Board hi Mamit, N.Kawnpui, Vairengte, Kolasib, Sairang, Saitual, Khawzawl, Champhai, Serchhip, Thenzawl, Hnahthial, Lawngtlai leh Siaha-ah te din theih a ni a. Mahse, tuna Aizawl Municipal Corporation (AMC) kal dan ang hi chuan khawpui danga Municipal sawrkar din belh zel tur chuan mipui rilru hneh a harsa tulh tulh ang. Mipui tana remchang siam lo, an phur ti rittu anga Municipal sawrkar hi an hmuh zel a hlauhawm khawp mai,” a ti.

Dr.Lallianchhunga chuan, “Sawrkar Laipui hian thingtlang leh khawpui Tualchhung Sorkar te hi a ngaipawimawh em em a. 15th Finance Commission hnuaiah sawrkar Laipui atanga an sum hmuh te chu an dawn atanga ni 10 chhungin state sawrkarin Tualchhung sawrkar te hnenah a pe chhuak thin tur a ni a. hei hi a ti khawtlai a nih chuan a pung nen a chawi zel dawn a ni,” a ti bawk.

AMC chungchang sawiin Dr. Lallianchhunga chuan, “Mipui phurrit tizangkhai tur leh mipuite tana dawr awlsamna tur kawng an siam thiam a hun tawh” tiin, “Tunah chuan inzirchawpa kal a hun tawh lo, tawnhriat nei tawh Corporator te’n AMC an enkawl tawh avangin mipuite tana dawr awlsam tura AMC hi an siam thiam a hun tawh takzet a ni,” a ti bawk.