Aizawl November 14, 2022 : Aizawl Municipal Corporation (AMC)-in AMC area veng hrang hranga Property Tax a khawn mekah chhiah punna a sang hle MPCC chuan an ti. Property Tax punna rate sang lutuk avangin chhungkaw tam tak an buai a, nikum 2021-2022 a Tax an pek zat atanga a punna chu 186% atanga 2221.79% te a ni, an ti a, Property Tax sang taka an lak chhan an zawt nghal bawk.

Nimina thuthat thehdarhtu te an hmachhawn naah MPCC Spokesman Dr. Lallianchhunga chuan, "Tuna Aizawl Municipal Corporation (AMC)-in Property Tax a khawn mekah hian a pun dan a mumal lo hle a.  In sak belh miah lo, khawih danglam miah lo te zingah pawh nasa taka pung a tam hle," a ti. 

Tax petu khua leh tui (citizen) thenkhatten kum 2021 leh 2022-a Property Tax an pek zat leh a punna chu hetiang hi niin a tarlang.

2021-2022       2022-2023           A punna          A punna %
Rs. 780/-          Rs. 18110/-          Rs. 17330/-      2221.79%
Rs. 350/-          Rs. 2057/-            Rs. 1707/-        487.71%
Rs. 1238/-        Rs. 6682/-            Rs. 5444/-        439.74%
Rs. 1198/-        Rs. 5864/-            Rs. 4666/-        389.48%
Rs. 1192/-        Rs. 5312/-            Rs. 4120/-        345.63%
Rs. 1008/-        Rs. 3222/-            Rs. 2214/-        219.54% 
Rs. 1673/-        Rs. 6067/-            Rs. 4394/-        262.64%
Rs. 1600/-        Rs. 4584/-            Rs. 2984/-        186.5%    

Dr. Lallianchhunga chuan, "Khawvel khawi ramah pawh chhiah hi pek thin a ni a, ram changkang apiangah chhiah hi a sang mai niin a lang. Amaherawhchu, mipuiin chhiah an pek danah kalphung fel tak a awm thin a, mipui chhiah pek tlingkhawm hman danah pawh mipui thikthu a chhe hle thin. Khua leh tui kan nih angin chhiah hi kan pe tur a ni a, amaherawhchu, tuna AMC Property Tax pun dan hi chu hriatthiam theih a ni lo a, dik lo taka mipui rawkna a ni. Tax an pek tur a san lutuk avanga complain tu tam tak an hlawhtlin avangin thil dik lo a tam tih a chiang hle. Central sawrkarin Municipal (AMC) puala pawisa a rawn pek te, Pu Zoramthanga kaihhruai MNF sawrkarin a hren sak rei lutuk avangin AMC hian pawisa an nei thlawt lo a, AMC-a thuneitu MNF Councillor-te hian Property Tax sang tak hmangin mipui an rawk ta mai em ni tih hi kan zawhna a ni," a ti.

The Mizoram Municipalities (Property Tax) Management Rules, 2014-in a sawi danin Property Tax rate hi rules in a sawi danin kumtin January thlaah Board of Councillors-in a hunlai mil turin an siamfel thin tur a ni a. Thil man hlutna sang zelah Property Tax hi a pung zel tur pawh a ni. Mi in a In a zauh emaw, a sak belh emaw, property a neih belh emaw chuan a a chawi zat a pung ngei tur a ni bawk. 

Property Tax hi India ramah chuan Municipal tinte sum hnar lian ber pakhat a ni thin a, Property Tax lakna tur dan pawh fel takin a awm vek a ni. Aizawl Municipal Corporation (AMC) area-ah pawh ni 16.6.2015 atangin Property Tax hi lak tan a ni a. Kum engemawzat AMC area a cheng, In leh lo nei ten Property Tax hi an pe tawh a ni. 

Congress chuan, "AMC hian Property Tax a khawn mek, a punna sang lutuk te hi a rang thei ang berin ennawn leh se la, assessment ti tha leh vek rawh se. Dik lo taka Tax an lo laksak tawh te pawh The Mizoram Municipalities (Property Tax) Management Rules, 2014, Rule 28 (1) in a sawi angin a rang thei ang berin pekir leh rawh se. Rule no. 39 leh 40 in a sawi angin Property Tax chungchanga lungawi lohna nei ten lungawilohna an thlenna tur leh a chingfeltu tur Municipal Appellate Tribunal hi a rang thei ang berin din bawk rawh se," an ti.