Forbes magazine chuan American hmeichhe milar zinga hausa zual a thlang chhuak a, Oprah Winfrey chuan dinhmun sang ber a luah. American business magazine list-ah hian Rihanna chu pahnihna a ni a, pathumna chu Kim Kardashian a ni.

Hmeichhe milar hausa zual zingah hian - Taylor Swift, Beyonce Knowles leh Madonna te pawh an tel. Taylor Swift hian nikum November 15 khan Eras tour ticket chu nikhat thil thuah copy maktaduai hnih (2) teh meuh a hralh a, Ticketmaster-ah hetiang zat ni khata hralh chhuak thei hi artist dang zingah an la awm ngai lo. 

Beyonce Knowles hian a vawi 32 nan Grammy Award a hlawh chhuak a, Rihanna pawh Super Bowl halftime show-ah ropui takin a inlan a, hei hian a sum lakluh kawngah pawh a pui nasa hle. 

List hi siam awlsam tak a ni hauh lo a, milar hausa tak tak an thurchhuak a, an zir chhiang leh. An hausakna belhkhawma $mtd 215 tling chin an thang chhuak a, chung zingah chuan - Sandra Bullock, Maria Sharapova leh Kris Jenner te an lang pha tawh lo thung. American hmeichhe lar zinga hausa zual te chu : 

Oprah Winfrey : Milar hmeichhe zinga hausa ber Oprah Winfrey hi kum 69 mi lai a ni tawh a, a hausak dan hi namai lo tak a ni - Forbes chuan $tld 2.5 zet nei angin a chhut hem mai! Amah hi talk show host a nih bakah, television producer, actress, author leh media proprietor a ni bawk. Winfrey hian nikum khan acre 900 zeta zau Maui-ah ram a lei a, Hawaiian, California leh Wyoming-ahte ram zau tak a nei bawk.

Rihanna
Zaithiam a ni a, sum pawh a hailut hnem hle. Super Bowl halftime show-ah a perform a, mi maktaduai 121 zetin an en. A sum lakluhna pawimawh tak chu music industry a ni a, chu aimaha a hausakpui chu Savage X Fenty company a ni. He company hi Puma nen tangkawpa an din a ni a, a hausa thur thur a ni ber - a hausakna hi $tld 1.4 a ni.   

Kim Kardashian
Lar ve hrim hrim, hausa em em reng bawk a ni deuh tawp mai. 'Keeping Up with the Kardashians' star hausakna hi $tld 1.2 a ni a, tluklehdingawn khat nei tling mi pathum zingah a tel. Kim Kardashian hian skin care company SKKN a nei a, a sum lakluhna pawimawh ber pakhat a ni. 

Taylor Swift
Bialpa then hlim Taylor Swift hausakna hi $mtd 740 a ni a, top 4-ah a lang. Swift hian album hralhna atangin leh tour atangin sum a lalut hnem hle a, music industry chu a sum lakluhna hnar ber a ni. Kum 33 mi hian tour a nei mek a, chhimtu mipui pawh an thahnem thin hle.  

Kylie Jenner
Hausa sawi a pianga hming langsar ni thin chu Kylie Jenner a ni a, tun tumah pawh hian top 5-ah a lang. Kum 25 mi Kylie Jenner hausakna hi $mtd 680 velin Forbes chuan a chhut a, a hausakna a tlahniam niin a lang. Social media star hian a larna hmang tangkaiin sumdawnna kalpui a, a tifuh hle. Instagram-ah follower maktaduai 390 chuang a nei a, Twitter leh Facebook lamah follower maktaduai eng emaw zat a nei bawk. Heng hi hmang tangkaiin sumdawn nan a hmang a, a hlawhtling hle. 

Beyonce Knowles
Paruknaah awmin a hausakna hi $mtd 540 a tling. American singer Beyonce Knowles hian studio album, pasarih a tichhuak tawh a, a hnuhnung ber 'Renaissance' chu nikum khan a tichhuak. Milar dangte ang thoin sumdawnna a kalpui a, clothing line  Ivy Park chu a sumbawm lian tak pakhat a ni. 

Celine Dion
A kum tam deuh tawh mah se a hausakna erawh a la turu viau - $mtd 480 zet a nei. Canada-a piang Celine Dion hian Las Vegas residency atangin sum a lalut hnem a, mahse a hriselna dinhmun a that tawk loh avangin duh angin a che chhuak thei lo. 

Judy Sheindlin
Top 10-a lang zingah chuan hriat lar loh ber a ni a, kum 80 mi lai a ni tawh bawk. American court-show arbitrator, media personality leh television producer ni bawk hi a hausa nek a, $mtd 480 vel zet nei anga chhut a ni. 

Dolly Parton
Kum 77 mi hi a hun laia zaithiam lar ber zinga mi a ni a, tun thlengin a la chuai tak tak thei lo. A hausakna hi $mtd 440 niin, boruak pawh a la nei lian hle. 

Top 10-a lang pha lo zingah hian lemchan thiam Reese Witherspoon ($mtd 440) bakah, Barbra Streisand ($mtd 430), Ellen Degeneres ($mtd 380), Serena Williams ($mtd 290) leh Shonda Rhimes ($mtd 250) te chu a langsar zual an ni. 

1. Oprah Winfrey Net worth: $tld 2.5
2. Rihanna - Net worth : $tld 1.4 
3. Kim Kardashian Net worth: $tld 1.2
4. Taylor Swift Net worth: $mtd 740 
5. Kylie Jenner Net worth: $mtd 680 
6. Madonna : Net worth: $mtd 580 
7. Beyonce Knowles Net worth: $mtd 540 
8. Celine Dion Net worth: $mtd 480 
9. Judy Sheindlin Net worth: $mtd 480 
10. Dolly Parton Net worth : $mtd 440