August 10, 2023; Cabinet minister ni mek, R. Lalzirliana te chhungkua chuan, kum 1989 atangin missionary an chawm tan a, tun thlenga an chawm zat chu 22 a tling.

ZALEN in an chhungkaw missionary chawm dan chungchang a zawhna ah, Pu Zira chuan, kum 1989 atangin missionary an chawm tan tih a sawi a, a u missionary a boral hnu-ah a ai tal tiin an chawm belh zel a, Mizoram sawrkar hnathawk ten 7th pay an hman hma zawng khan missionary 12 an chawm.

7th pay hman a nih hnu, MLA leh minister te hlawh tihpun a nih hnu-ah missionary dang 10 chawm belh lehin, tun thleng a missionary an chawm zat chu 22 a ni.

A hun hmasa lamah Pu Zira hi class II contractor a ni thin a, bus leh tipper te neiin, chung an lirthei te thawhchhuah hmang chuan bultanin, missionary an chawm thin.

"Intumchawp Pathian a ni a, kan chawmna zat pek tur kan daih dawn lo nia a lan pawhin, kan lirthei te thawh chhuah hmang chuan kan tlin leh mai thin," Pu Zira chuan a ti. Hei hi an hun hmasa lam a missionary an chawm dan thin a ni.

Tawi bialtu MLA, kumin inthlan a Aizawl North I a MNF ticket a ding tur a ngaih R. Lalzirliana hi, bial ngai a term 5 a zawn a MLA tling thei niin, a zawn a term 4 chhung cabinet minister ni thei a ni a, ani ang hi Mizoram politician zingah an la awm lo nia hriat a ni.

(An Politics zinkawng ni lo, thil danga an inhmanna leh an inpekna lam hi politician dangte pawh a remchan dan anga rawn tarlan chhunzawm zel tum a ni.)