Rushdie-a nunkhua

1947 - Bombay khawpui, tuna Mumbai ni ta, India ramah a piang

14 - Kum 1975 leh 2019 inkarah hetiang zat thawnthu (novel) hi a ziak

5 - Booker prize dawng thei turin heti zat hi chhawp chhuah a ni tawh a, a novel pahnihna, Midnight's Children vangin kum 1981-ah a dawng

9 - Iran-a sakhaw hruaituin a novel pakhat, The Setanic Verses-ah an sakhua a sawi bawrhbang tia puhin thah tur a tih avangin kum kua zet a biru

2007 -Thu leh hla lama a thawh hlawkna avangin knight nihna pek a ni

New York, United States-a vih a nih hnuah Salman Rushdie-a chuan chanchin lawmawm lam a la nei thei lo tih a agent chuan a sawi.

Dawhsana a awm laia beih tawk a ni a, ventilator-a thawktir niin a tawng thei rih lo tih Andrew Wylie chuan a sawi a. Lehkhabu ziaktu lar, kum 75 mi hian a mit lehlam a chân bawk tih a sawi.

Rushdie-a hi kum 1988-a a tihchhuah, The Satanic Verses lehkhabu avangin Islamist tam takin thahah an vau a ni.

Police chuan a vittu nia an puh, kum 24 mi, Hadi Matar chu Fairview, New Jersey-ah an man tih an sawi.

New York State Police chuan New York state khawthlang lama a Chautauqua Institution-ah a vittu hi dawhsanah tlan lawnin Rushdie-a leh amah kawmtu chu a bei ta mai niin an sawi.

Rushdie-a hi a nghawngah vawi khat vih a nih bakah a dulah vih a ni bawk tih thuneitute chuan an sawi a. Erie, Pennsylvania-ah helicopter-a phurh a ni.

“Salman hian a mit lehlam a chân hmel a; a bana a thazam pawh a khawih a; a thinah vih niin a chhe bawk,” tiin a agent chuan a sawi.

Police chuan beih a nih chhan leh a titua puh lakah thubuai siam a la ni lo tih an sawi a, centre-a backpack leh electronic device an hmuhte en chian phalna an dil mek.

Police chuan mipuite tlanin a beitu hi an theh thlu nghal a, man a ni tih an sawi a. Mipui zinga awm doctor-in a enkawlna hmasa tur a ti nghal tih an sawi.

Amah kawmtu, Henry Reese pawhin a lu-ah hliam tenau a tuar a, tual chhung damdawi inah hruai a ni a. Reese-a hi hlawkna um lo pawl pakhat dintu zinga mi a ni a, an pawl hi lehkha ziaktuten  vauna an dawn laka hima an chhuah theih nana hma laksaktu an ni.

Indian novelist Rushdie-a hi kum 1981-a a tihchhuah, Midnight’s Children atanga hriat hlawh niin UK-ah ringawt pawh bu maktaduai chuang hralh a ni.

A lehkhabu palina, kum 1988-a a tihchhuah The Satanic Verses chu Islam-ten an haw hle a, kum 10 dawn a biruk phah.

He thawnthu hi Muslim tan takin an sakhua leh an pathian tihbawrhbannaah an ngai a, ram tam takah zawrh pawh khap a ni hial.

India-a Rushdie-a duh lohna lantirnaah pawh thi an lo awm nual tawh a. Iran-ah pawh Tehran-a British embassy chu lunga vawm a lo ni tawh.

Kum 1991 khan Japanese-a lettu pawh vih hlum a lo ni tawh a. A hnu lawkah Italian-a lettu pawh vih niin a lehkhabu tichhuaktu, Norwegian publisher William Nygaard pawh kah a ni a, an dam chhuak ve ve thung.

Lehkhabu a chhuah hnu kumah Iran-a Supreme Leader Ayatollah Khomeini chuan Rushdie-a chu tihhlum a nih tur thu a puang a. A lumanah $ maktaduai 3 a chhiar bawk a. An ram sorkar erawh chuan hei hi a tawmpui leh puih loh thu engmah a sawi lo.

Tun tuma vih a nih hian Iranian sorkar chuan engmah a la sawi lo bawk.

Kum 2007-a Queen-in pasaltha nihna a hlan pawh khan Iran leh Pakistan-ah chuan duh lohna nasa taka lantir a ni.