Aizawl; Kum 2006 atanga kumin 2021 thlengin Anthurium festival hmanna atan Government of India, Ministry of Tourism atangin cheng nuai 255 hmuh a ni tawh a, kumin Anthurium festival (Virtual) hmanna sum senso sanna ber chu  documentary siamna leh Cable TV channel/DD Mizoram a thehdarhna man (broadcast fee) niin, hemi atan hian Rs. 4,40,000/- hman a ni.        

Kumin October ni 28-29 a Virtual Anthurium festival hman-na sum hmuhna leh sum hman dan RTI zawhna Tourism department chhanna atanga a lan danin, festival hmanna atan Rs. 25,00,204 hman ral niin, sum hman bang a awm lo. 

RTI chhanna atanga a lan danin TV channel 4, Zonet ZAWLBUK (6:30-11pm), Zonet Bawhbel (6:30-11pm), LPS 10 (6:30-11pm), LPS 1 (6:30-11pm) leh DD Mizoram (6:30-11pm) ah LIVE in tih chhuah a ni a, ZONET leh LPS ah Rs. 40,000, DD Mizoram ah Rs. 1,06,200 sen a ni.

Kum 2006 atangin Mizoramah Anthurium festival hman tan a ni a, festival hmanna senso chu Ministry of Tourism, Government of India, New Delhi atanga hmuh thin a ni. Kum 2010 thlengin cheng nuai 10 hmuh thin a ni a, kum 2011 atangin cheng nuai 25 hmuh thin a ni.

RTI chhanna a tarlan a nih danin, Anthurium festival-2021 atan event management firm pakhat Aizawl hman a ni bawk.