Aizawl May 9, 2023 : Mizoram Cooperative Apex Bank Ltd. Chairman T. Lalmuanpuii chuan Mizoram Cooperative Societies Act Section 53 hnuaia Proviso - Cooperative Society Hruaituten kum 10 aia rei hruaitu nihna chelh theih lohna dan chu Cooperative hmasawnna daltu nia a ngaih thu a sawi. A mimal chungchangah Political Party atanga sawmna a dawng thin tih a sawi a, Cooperative chu a rawngbawlna tura a ngaih a nih avangin sawmna te hi a hnawl tih a sawi.

T. Lalmuanpuii chuan He provisio atanga he dan paih chungchangah State Level Cooperative Society te ngaihdan hre duhin RCS chuan hemi chungchang hi State Level Cooperative Society te an Assembly theuha lo ngaihtuah turin a ti a, 2016 khan hei hi ngaihtuahin an General Assembly theuhah he dan hi paih ngei duhin100-a 100 in an ban pharin paih nise tih an lo rel tawh, a ti. Heti chung hian 2017-ah an duh loh dan chu ammend a ni ta tho tih a sawi.

Mizoram Cooperative Societies Act Section 53 hnuai Proviso paih chungchangah Chief Minister thurawn angin Mizoram-a he dan paih duhtu Society te signature leh seal la khawmin an thehlut tih a sawi a, CM thurawn hi ngaihchan mek a tih thu sawiin, State level Society leh Primary Cooperative Societies te duh loh Dan hi society te inthlan hun hma ngeia paih a nih ngei an beisei thu a sawi bawk.

Apex Bank Chairman chuan Cooperative Movement hmanga Mizoram chu tihhmasawn theih a nih beiseiin sawrkar hna a bansan thu a sawi. Political party atanga an party-a lut a, AMC leh MLA Candidate ni tura sawm der a nih fo thin thu leh Cooperative chu a rawngbawlna tura a ngaih a nih a avangin a hnawl thin thu a sawi. "Cooperative tih hmasawnna kawnga ka kut phuar a nih lo a, a thawh theih chhung chu Cooperative-ah inhman ka duh. Tunhnaia MLA candidate tum anga thu thang awm hi thu belh chian dawl lo a ni a, kumin inthlanah khawi party atanga maha MLA chuh ka tum lo," a ti.