April 24, 2023; Tun April thla kal mek chhung hian Mizoram ah tui tla hlum mi pariat (8) an awm tawh. Khua a lum chho a, lui dung pan a nawm hunlai a ni. Mitin kan fimkhur a ngai hle.

ZALEN in a chhinchhiah dan leh a hriat theih chin ah, tun April thla kal mek chhung a tui tla hlum mi pariat zinga pasarih te chu mipa an ni a, hmeichhia pakhat awmin, kumtling lo kum 17 mi leh kum 11 mi an tel bawk.

Tunlaiin khua a lum chho a, Mizoram hmun hrang hrangah lui dung a intihlim turte, inchiah dai tur te a kal, chhungkua, thianho leh pawlho te an tam chho mek a, chetsual theihna hrang hrang lakah fimkhur a ngai hle.

A theih chin chinah sawrkar pawhin ruahmanna a siam chho mek a, tunhnai khan District Disaster Management Authority, Mamit District, 1st Bn. NDRF leh BDO Zawlnuam tangkawpin Langkaih lui Area a YMA leh thalai tlawmngaite tan tui tla chhanchhuah leh tui tla zawnga chet chhuah dan inzirtirna hun neih a ni.