Aizawl April 12, 2024 : India ramah a vawi khat nan Aprilia bike tihchhuah a ni a, Ningani zan khan CK Cars showroom Bawngkawn, Aizawl-ah tlangzarh a nih rualin Mizo rider Lalawmpuia a lei nghal.

Tlangzarh inkhawm hi Info Bikes-in an youtube channel-ah live-in an pe chhuak a, youtuber dangte leh Mizo rider engmaw zatin an bawr bawk a. Rs 4,69,709-a lei ngai ni mah se neih manhla leh sports bike tha bik a nih ngei an beisei a ni.

Mizorama Vespa leh Aprilia dealer principal Pu Joseph Lalchhanhima chuan, "Mizo thalaiten sports bike an lawm a, Aprilia RS 457 hi an duhna phuhru thei a nih ngei ka ring," a ti.

Tunhnaiah khawvela motorcycle intlansiakna sang ber MotoGP-ah Italian team Aprilia-in hma an sawn avangin, Mizo thalaite duh zawng tak a nih a beisei tel bawk a ni.

Mizoramah pali rawn thlengin tual chhung inelnaa rider hlawhtling leh daih rei ber pawl Lalawma'n a lei hmasa ber a. Demo leh khalh chhin duhte hman tur bik pahnih an dah hrang a, a dang pakhat an hralh chhuak nghal bawk.

Info Bikes hotupa Vanlalmuana chuan : "Sports bike, chak taka tlan theihna tur, thiamna sang leh changkang em ema thuam a ni a. Chak taka tlan nan mai bakah tlan muan nuam tura duan a ni tel," a ti.

Muantea chuan, India ramah Aprilia-in scooter chiah a hralh chhuak thin a, RS 457 hi India-ah siamin he rama bike an hralh chhuah hmasak ber a nih bakah, ram dangah an thawn chhuak dawn bawk, a ti.

Rawng chi hrang pathum awmin petrol litre 13 thun theih, engine len zawng 457 cc a ni a. A duh tan intiamkamna telin Aprilia showroom atangin a khalh chhin theih a ni.

APRILIA RS 457

A MAN : Rs 4,69,709 (on-road, Mizoram)

ENGINE : 457 cc parallel twin, liquid-cooled, DOHC four-valve

POWER : 47 BHP @ 9,400 rpm & 43.5 Nm @ 6,700 rpm

MILEAGE : 30 kmpl

KERD WEIGHT : 175 kg

TYRE TYPE : Tubeless

BRAKES : Double Disc (A ke hma - 320 mm disc & radial-mounted 4-piston; a ke hnung - 220 mm disc & single-piston caliper). Dual-channel ABS.

SUSPENSION : A hma - 41 mm USD fork, a sawh tinep turin 120 mm thlenga insiam rem thei. A hnung - monoshock, a sawh tinep tura 130 mm thlenga insiam rem thei.

TECHNOLOGY : MotoGP bike an siam dan angin wire hmangin engine thunun a nih bakah power, torque leh traction control atan mode chi thum - sport, raod leh rain a awm. Heng mode hrangte hi duh dan ang zela hman theih a nih rualin hman kher tul ti lo tan off mai theih a ni bawk.