Aizawl : Ex MNA te chuan Assam Rifle Zokhawsang rama insawn tura tih chungchangah Chief Minister Zoramthanga’n dawt a sawi lo, an ti a,  Central sawrkar in  a thupek a hlenchhuah loh vanga insawn lo an ni zawk.  Ministry of Home Affairs-in Aizawl atanga AR sawn chhuah tura a tihna  copy pawh hmuh tur a awm, an ti. 

Zokhawsanga AR insawnna turah hian kawng tha taka siam zawh a ni tawh a,  Power pawh bun fel vek ni tawhin Water Supply pawh tihfel vek a ni a. Chenna tur in (building) pawh  an mawmawh zat chu sak zawh vek tawh niin chenna tura peih fel vek a ni tawh. Chuti chung chuan battalion headquarters leh unit thenkhat vawiin thlengin Aizawlah an la awm lui zel a ni, an ti bawk.

Chanchinthar lakhawmtute an hmachhawn naah Ex MNA te chuan, Kum 1988 April-a AR ground luhna gate bulah civil tlangval thenkhat leh A.R thenkhat an intibuai a, chu chuan buaina lian zawk a thlen a. Assam Rifle-te chuan silai chelekin mipui pawisawi lo an pawng kah an ti a, mi engemaw zat an kaphlum a, hliam pawh engemawzat an awm an ti. 
Hetih laia Mizoram Chief Minister Laldenga (RIP) chuan Central sawrkarah Aizawl khawpui lailia Assam Rifle awmte chu sawn chhuak turin a ngen a. Mizoram sawrkarin an insawnna tur hmun a zawng nghal a, Zokhawsang chu an insawnchhuahna atan tih fel a ni a, in hmun nei leh huan lo ram neite chu Central sawrkarin compensation a pe a, Assam Rifle awmna tura hmalak nghal a ni.  Kum 20 vel kal ta atang khan Assam Rifle engemaw zat chu Zokhawsangah hian an insawn tawh a, battalion Hqrs. leh unit thenkhat chu  insawn duh lovin Aizawlah an la awm lui a ni, an ti.

 Kum 2019 Chapchar Kut lawmna AR Ground-a neih a nih khan Chief Minister  Zoramthanga’n ‘Kumin May thla hi chuan Assam Rifle-te hi Zokhawsang ramah an insawn tawh ang’ tiin a sawi a, mi thenkhatin Chief Minister Zoramthanga chu ‘dawthei’ tiin an bei zui ta nghe nghe a ni. 

Ministry of Home Affairs, Union Govt. in DG Assam Rifle Shillong hnenah Aizawla Assam Rifle awmte chu Zokhawsanga insawn tura hriattirin ni 31/5/2019 a Zokhawsanga an insawn thu lehkhaa report turin a  hriattir a. Central hruaitu ten Pu Zoramthanga  hnenah Aizawla Assam Rifle awmte chu May thla 2019-a Zokhawsanga an insawn tur thu an hrilh bawk a. May thla a ral a, an insawn tak loh avangin Ministry of Home Affairs-in kum 2020 monsoon thlen hma ngeiin Aizawla Assam Rifle awmte chu Aizawl atanga Zokhawsanga insawn turin  Lt. General Sukhdeep Sangwan, Director General Assam Rifle Shillong hnenah a hriattir leh a. An hunbi tuk chu  March  ni 31, 2020 a ni. Chuti chung pawh chuan an la insawn duh ta chuang lo a ni.