August 23, 2023; Chief minister Zoramthangan Assam Rifles te awmna tur peihfel thawkhat a ni tawh tih sawiin, "Chhuanlam tin reng zawng in an la muang chang a, sawrkarin kan nawr reng a, chhuah kim tir thuai turin chak takin hma kan la mek," a ti.

Vawiin Assembly Session zawhna leh chhanna huna member te zawhna chhan belhin chief minister chuan, AR te chu platoon emaw section in emaw an chhuahna a rei tawh tih sawiin, "An chhuak mek reng a, an la chhuak vek lo hi kan buaina chu a ni. Vawi leh khat chhuah vek a har a nih pawhin, mipui leh sawrkarin a mamawhna hmun kian zawngin chhuak ula tiin kan nawr," a ti bawk.

Manipur buaina in na takin Union Home Ministry a nghawng tih sawi bawkin, chu chuan Assam Rifles te ah pawh nghawng a nei tih tarlangin, Mizoram lam thlengin nghawng a neih phah niin a sawi.

"Union Home Ministry in kum 2020 May thla chhungin an chhuak ngei tur a ni tih order a siam a, chu chu sawiin keini pawhin May ah chuan kan ta a nih tur thu kan sawi chhawng a, mahse covid avangin a lo tih theih ta bik loh," ti bawkin, chief minister chuan, "Ram engkim a kal fel thawkhat hle tawh a, chhuanlam tin reng zawng in an la muangchang a, Mizoram sawrkarin kan nawr reng a, chhuah kim tir thuai turin chak takin hma kan la mek," a ti bawk.