ZALEN, July 28, 2026: LPS Pro Fight nen thawk dun chhunzawm tura an inrem rualin RC Shirt House-in sulhnu chhinchhiahtlak an neih belh a, Mizoram infiamna huang chhung event lianthamah official shirt sponsor ni zawn rei ber an ni chhunzawm zel.

Kum 2009 khan Mizoram infiamna huanga television live show hmasa ber, LPS Pro Fight tan a ni a, Aizawl khawpuia mipa thawmna thuina leh zawrhna hmunpui, RC Shirt House nen thawk dun nghalin, heta tang hian chatlak awm lovin organising committee leh technical official-te thawmhnaw tumsakin peng pawimawh tak an ni ziah thin.

Organising committee chuan RC Shirt House neitu, Lalmuanpuia te chhungkua nen a tir atanga tun thlenga thawh hona tha tak an neih chhunzawm zel theih avangin lawmawm a ti a, Mizoram boxing leh Mizo boxer-te hmasawnna duhtu an nih avangin an inpekna ropui a ti hle.

RC Shirt House nen an thawh dun atangin kum 17-na a ni tawh a, a vawi 12 nan organising committee-te thuamhnaw bakah referee leh judge-te kawr leh kekawr hak tur an tumsak dawn a, kum dang zawng aiin tun tumah hian thawmhnaw an pe hnem leh zual dawn bawk.

Mizoram infiamna event lian sponsor-tute zingah RC Shirt House anga daih rei hi hriat an la awm lo va. Pro Fight Organising Committee chuan kum 2023 khan Mizoram infiamna huangah official shirt sponsor ni zawn rei ber an nih thu a lo tar lang tawh a ni.

Pro Fight vawi 12-naah hian championship hnuhnung ber, kum 2024 ang bawkin weight hrang panga - fly (kg 48-52), bantam (kg 52-56), light (kg 56-61), welter (kg 61-67) leh middle (kg 67-74)-ah title an inchuh leh dawn a. Lawmman pawisa fai sem chhuah tur Rs 6,50,000 ruahman a nih bakah best boxer, promising boxer, best challenger, best referee leh best judge chawimawina sem tel a ni bawk ang.

Champion lai - fly Lalrinngheta (Tuipui), bantam Laldinsanga (Ramthar Veng Lunglei), light Lalkhawngaiha (Venghlui), welter Lallawmawma (Tuipui) leh middle F Lalthanliana Junior (Electric Veng Lunglei) ten title humhim turin hun tha an nei dawn a, an humhim dawn lo a nih chuan champion kawnghren an kawl mek an pek kir a ngai thung ang.

August 1 atangin LPS Office, Zarkawt leh Dozoma Tarmit Dawr, Zodin Square-ah tel duh tan Rs 10-in entry form lak chhuah theih a ni a, August 31 ral hmain theh luh tur a ni a. September 4-ah LPS Arena, Falkland-ah tel turte hriselna endikin an inbuk ang.

Kum 17 atanga 40 inkar, Mizoram chhung leh pawn atangin a duh apiang mahni insengsovin a tel theih a, professional ni lovin Pro Fight kalphung pangngai angin a kalpui tur a ni a; title fight neih zawh a nih hnuah a hranpain professional inhnek buatsaih zui turin ruahmanna siam a ni.