ZALEN October 28, 2024 : Ni 23.10 2024-a Assam Rifles leh Mizoram sawrkârin Aizawl khawpui chhûng atanga Zokhawsâng-a Assam Rifles-te insawn chhuahna tur Memorandum of Agreement an ziak fel ta chu ZPM Zonu Headquarters chuan lawmawm an ti a, inremna ziah a nih theihna atana hmalatu Chief Minister Lalduhoma chu Tawlhloh puan an bahtir.

ZPM Zonu chuan, "Kum tam tak chhûnga sawrkârna lo chelh tawh party-te'n theihtawp chhuaha an lo beih tawh hlawhtling thei lo, ZPM kaihhruai sawrkâr thla 10 leka upa-in Assam Rifles-te insawn chhuahna tur Memorandum of Agreement a ziahpui thei mai hi sawrkâra a hotuber Pu Lalduhoma leadership rintlakzia leh thatzia tarlanna chiang takah kan ngai a, hnam dang, state sawrkâr hnuai ni lova sawrkâr hnathawkte pawhin a thu an ngaih thlak Chief Minister kan nei hi hmasâwnna nasa takah kan ngai a, he thil avâng hian Chief Minister Pu Lalduhoma chu ram leh hnam a kaihhruai zêlna turah duhsakna hlânin Zonu chuan tawlhlohpuan kan bah tir a ni," an ti.

Mizo hnam chu hnam zahawm a lo nih theihna tur leh, Mizoram politics-ah Pathian ram a lo thlen theihna tura beihna kal chho zêlah, a dodâltute atangin dawt leh thu dik chanve hmanga inbeihna a tam êm êm a, hengah hian Zonu Headquarters chuan ZPM ministry a ring tawk a, dikna leh rinawmna in hnehna a chang leh thin tih hi ZPM Zonu chuan an dinna a nih thu an tarlang.

ZPM Zonu chuan, "A taka hna thawk mi Chief Minister kan nei hi a lawmawm kan tiin, a thlamuanthlâk kan ti a, Chief Minister Pu Lalduhoma leh a kaihhruai ministry chu ram leh hnam tâna nghet taka ding zêl tur leh leh tawlh lo turin duhsakna kan hlân a, ram leh hnam tâna sawrkârin ke a pênna kawngah sawrkâr kan thlawp zêl dawn a ni," an ti.

Chief Minister tawlhlohpuan bah tir hun tawi Chief Minister Office-a neihah hian ZPM Zonu Headquarters aiawhin Zonu President R.Lalawmpuii'n CM hi tawlhlohpuan a bah tîr a, Zonu hruaitu dangin an tawiawm a ni.