Aizawl : India hmachhaka zirlai pawl lian intelkhawmna North East Students Organisation (NESO) chuan thuchhuah siamin tun hnaia sawrkar laipui, Ministry of Home Affairs-in Assam Rifles te thuneihna a pek dan chu hmarchhak mi te hnuaichhiah naah an ngaih thu an tarlang.
Tun hnai khan Government of India (GOI), Minsitry of Home Affairs chuan Assam, Nagaland, Mizoram, Arunachal Pradesh leh Manipur a hman turin Assam Rifles te chu an mi rinhleh zawng te chu man nghal zel thei leh khawi hmun pawh an duh duha dap thei turin thuneihna tawp a pe. He thil hi NESO chuan na taka demin GOI chu state te thuneihna tih nep sakah puhin, hei hian BJP kaihhruai central sawrkar hian Hmarchhak chhulchhuak te laka a rilru put hmang hi a ti chiang leh zual niin an ngai.
NESO chuan he thil a kalpui chhan hi Rajya Sabha neih zawh taka CAB kaltlangpui a nih tak rih loh vanga central sawrkar lungawi lohna nen inkungkaihna a nei nge, Lok Sabha inthlan zawhah BJP te hian CAB hi tharthawh leh an tum vanga mipui lungawi lohna reng reng hmet mit turin Assam Rifles te hi hmanhruaah hman an tum zawk, tih chu an zawhna a ni.
Armed Forces (Special Powers) Acts (AFSPA) hmanga Hmarchhak mi ten harsatna namen lo kum tam tak an tawrh tawh chu la duhtawk lovin GOI hian he dan hi an lekkawh leh zel a, hemi piah lamah Ministry of Home Affairs hian an thuchhuah atang hian rawng leh zual chet an tum niin an ngai.
GOI hian chhan leh vang mumal pawh awm lova hetianga hma a la leh ta ni Hmarchhak chhulchhuak te laka nunrawnna lantirah an puh a, hei vang hian NESO chuan hmachhak mipui te chu tangrual a, hetiang lama hmalakna te chu ngaih-ven renga, thuang khata penchhuak zel thei turin a ngen.
NESO-ah hian India hmarchhak state pasariha zirlai pawl lian ber ber pariat - Khasi Students Union (KSU), All Assam Students Union (AASU), Naga Stidents Union (NSF), Mizo Zirlai Pawl (MZP), Twipra Students Federation (TSF), All Manipur Students Union (AMSU) Garo Students Union (GSU) leh All Arunachal Pradesh Students Union (AAPSU) te an tel a ni.