Inrinni zan Premier League inkhelah Arsenal leh Manchester City ten an khingpui an hneh ve ve a, Manchester United erawh an chak lo nawn. 

Arsenal hian Leicester City mikhualin 4-2 an chak a, champion lai Manchester City ten Premier League kaithar Bournemouth mikhualin 4-0 zetin an  hneh bawk. Gunners leh City te hi an game hmasa zawkah an chak ve ve bawk. Game an khelh hmasak bera chak zo lo Manchester United chuan Brentford hmachhawnin si 4 zet phurin an tlawm.

Champion lai City hian champion leh thei an nih zia pho langin Etihad Stadium-ah Ilkay Gundogan, Kevin de Bruyne leh Phil Foden te hmangin goal an thun a, Bournemouth defender Jefferson Lerma own goal nen si li faiin an chak thei. 

Pawisa hmang thiam Arsenal hi season liam taa an tiatpui Leicester City chuan an khan ta lo deuh niin a ngaih theih a, Emirates Stadium inkhelah hian mual neitu Arsenal striker thar Gabriel Jesus chuan goal hnih a khung a, Granit Xhaka leh Gabriel Martinelli ten goal khat ve ve an thun bawk. Mikual team Leicester City tan James Maddison-a'n goal khungin, an goal khat dang hi Arsenal defender William Saliba'n an mahni lama a tih luh palh a ni.   

Mahni muala Brighton hneh tawhlotu United an mualpho leh chiang hle a, first half-ah Brentford tan hian Josh Dasilva, Mathias Jensen, Ben Mee leh Bryan Mbeumo ten goal khat theuh an khung a, awlsam takin 4-0 in an chak a ni.