Aizawl June 27, 2024: Vawiin khan SCERT tualzawl, Chaltlangah Education Minister Dr. Vanlalthlana chuan ‘42nd State Level Science, Mathematics & Environment Exhibition and Edutech Festival 2024’ a hawng a. ‘Science & Technology for Society’ tih thupui a hman niin Sub-Theme ah ‘Health, Lifestyle for Environment, Agriculture, Communication and Transport leh Computational Thinking’ tih hman a ni.

Education Minister Dr. Vanlalthlana chuan khawvel changkanna ina a ken tel thiamna hmang thiam leh hmang tangkai hmasatu nih a pawimawh zia sawiin chutiang a hmang tangkaitu nih hmasak tum chuan intlansiakna leh inelna nasa tak a awm thin thu a sawi a. Ram dangte rual a hmasawnna kawng zawh a nih theih nan Mizo thalaite pawhin heng thiamnate hi chhawr thiam ve zel a tul thu a sawi.

Khawvel sumdawnna lian ber berte thlan chhuah zinga a tam zawk chu Technology behchhan sumdawnnate an nih thu Education Minister chuan Technology thar hman tangkai nachang hre lo company lian tak takte chu an tluk chhiat phah thin thu a sawi a. Khawvel-in a buaipui mek ‘Artificial Intelligence’ pawh luhchilh a, zirchian a, hman tangkai tum ve a pawimawh thu a sawi.

42nd State Level Science, Mathematics & Environment Exhibition atan hian District 5 atangin school 13 an tel a, Model/Exhibit 43 an phochhuak a ni. Heng Exhibit 43 te hi uluk tak a endik an nih hnu ah National Level Exhibition-a tel tur thlan chhuah a ni ang. EduTech Festival 2024 atan hian Stall 10 phochhuah a ni a, chungte chu Mizoram Scholarship Board, Mizoram State e-Governance Society, Buannel Studio Pvt. Ltd, Netsurf Internet Service, Reliance Jio Infocomm Ltd., NIELIT Aizawl, Aricky Camera & Accessories, Click Studio, NeVA leh ICT, SCERT-te an ni.