ZALEN, November 18, 2025: Badminton Association of India (BAI) hnuaia ram pum zone ngaa thena zone champion theuh leh inelna thlengtu inelna, Inter State - Inter Zonal & Junior National Badminton Championship 2025 khel turin Mizo shuttler 12 leh anmahni hruaitute chu Arunachal Pradesh-ah an thang mek.

Yonex-Sunrise 48th Inter State - Inter Zonal & Junior National Badminton Championship 2025 hi Thawhlehni atanga khelh tan niin Thawhtanni lo awm leh tur thleng tawh tur a ni a, Itanagar khawpuiah Arunachal Pradesh-in a thleng a ni.

Mizoram aiawh tur player-te hi hmun hrang hranga inzira awm mekte an ni hlawm a, official-te nen hian inelna hmun tur hi an pan khawm a ni.

Thawhlehni leh Nilainiah team inelna bik, Inter State - Inter Zonal Championship khelh a ni dawn a, Mizoram Under 19 Boy’s team chu North East Zone champion an nih angin team inelnaah hian an tel dawn a, Seeded No. 2 an ni nghe nghe. 

Mizoram hian nikum khan bronze medal an dawng a, kumin inelnaah hian nikuma final lut team tel thei lo an awm avangin Mizoram hi telin Seeded No. 2 pawh an nih theih phah a. West Zone champion Chhattisgarh leh East Zone champion Uttarakhand inkhela a chak zawk zawk an hmachhawn dawn a ni.

Ningani atanga mi mal inelna khelh chhunzawm turah category hrang hrangah Mizo player an inlan kim dawn a. Mixed doubles leh Boy’s Doubles-ah seeded ni chungin C. Lalramsanga a inlan ang a. H. Lalthazuala (Boy’s Singles) leh Lalrempuii (Girl’s Doubles) te pawhin seeded ni chungin inelna an hmachhawn dawn a ni.

Mizoram Badminton Association (MBA) chuan Mizoram aiawh tur player leh official-te chu ram tihmingthatu ni turin duhsakna a hlan.

Mizoram aiawh tur player leh official-te:

1. H. Lalthazuala, Chanmari West, Chanmari Shuttlers Club

2. C. Lalramsanga, Durtlang, Mission Veng Badminton Club

3. Sainunmawia Sailo, Ramhlun Venglai, Sihphir Badminton Club 

4. Malsawmhlua, Serchhip P&E Veng, New Serchhip Badminton Club 

5. Vanlalmalsawmzuala, Serchhip, New Serchhip Badminton Club 

6. Vanlalpekhlua Sailo, Serchhip, Chaltlang Badminton Club 

7. Vanlalhruaia Sailo, Serchhip, Chaltlang Badminton Club 

8. Lalrempuii, Serchhip, New Serchhip Badminton Club 

9. H. Lalrinhlui, Chanmari West, Chanmari Shuttlers Club 

10. Lalrinkimi, Mission Veng, Mission Veng Badminton Academy 

11. Zoramthari Renthlei, Champhai Vengthlang, Sihphir Badminton Club 

12. Ramngaihzuali, Ramhlun South, Sihphir Badminton Club 

Manager: Dr Malsawmkima, Mission Veng 

Coach: Lalhlimpuia, Mission Veng